قلعہ سیف اللہ میں منشیات کے خاتمے کے لیے ضلعی انتظامیہ نے بڑی کارروائی کرتے ہوئے بھنگ کی کاشت میں ملوث زمینداروں کی فہرست تیار کر لی ہے۔ ڈپٹی کمشنر ساگر کمار کے مطابق ان افراد کے نام باضابطہ طور پر محکمہ داخلہ کو ارسال کر دیے گئے ہیں، جبکہ انہیں فورتھ شیڈول میں شامل کرنے کی سفارش بھی کی گئی ہے تاکہ ان کی سخت نگرانی اور قانونی کارروائی ممکن ہو سکے۔
ڈپٹی کمشنر نے بتایا کہ نوجوان نسل کو منشیات کے تباہ کن اثرات سے بچانے کے لیے انتظامیہ عملی اور مؤثر اقدامات کر رہی ہے۔ انہوں نے عوام سے اپیل کی کہ وہ اپنے علاقے میں کسی بھی مشکوک سرگرمی کی نشاندہی کریں تاکہ منشیات اور جرائم کے خلاف زیرو ٹالرنس پالیسی مزید مضبوط ہو سکے۔
ان کا کہنا تھا کہ قلعہ سیف اللہ کو پرامن اور محفوظ ضلع بنانے کے لیے انتظامیہ پُرعزم ہے اور قانون شکنی کے خلاف بلاامتیاز کارروائیاں جاری رہیں گی۔
