ریاض میں جاری اسلامک سالیڈیریٹی گیمز میں پاکستانی جیولن تھرو ایتھلیٹس نے شاندار کارکردگی دکھاتے ہوئے قوم کا سر فخر سے بلند کر دیا۔ اولمپک گولڈ میڈلسٹ ارشد ندیم نے جیولن تھرو میں ایک بار پھر سب پر برتری ثابت کرتے ہوئے گولڈ میڈل حاصل کیا، جبکہ یاسر سلطان نے عمدہ کارکردگی کے ساتھ سلور میڈل جیتا۔
تفصیلات کے مطابق ارشد ندیم کو گولڈ میڈل پر 50 لاکھ روپے جبکہ یاسر سلطان کو سلور میڈل کے بدلے 30 لاکھ روپے انعام دیا جائے گا۔ یہ رقم پاکستان اسپورٹس بورڈ کی جانب سے جولائی میں ترمیم شدہ کیش پرائز ایوارڈ پالیسی کے مطابق ہے، جس میں ڈائریکٹر جنرل یاسر پیرزادہ کی کوششوں سے نمایاں اضافہ کیا گیا تھا۔
نئی پالیسی کے مطابق اسلامک سالیڈیریٹی گیمز میں سونے کا تمغہ جیتنے والے کھلاڑی کے لیے 50 لاکھ اور چاندی کا تمغہ لینے والے کے لیے 30 لاکھ روپے انعام مقرر ہیں۔
ارشد ندیم نے فائنل میں 83.05 میٹر کی شاندار تھرو کے ساتھ گولڈ میڈل اپنے نام کیا، جبکہ یاسر سلطان نے 76.04 میٹر کی تھرو کے ساتھ سلور میڈل حاصل کیا۔
اسلامک سالیڈیرٹی گیمز: جیولن تھرو میں ارشد ندیم نے گولڈ، یاسر سلطان نے سلور جیت لیا
پاکستان اولمپک ایسوسی ایشن کے صدر عارف سعید اور سیکرٹری خالد محمود نے دونوں ایتھلیٹس کو مبارکباد دیتے ہوئے کہا کہ ان کی شاندار کارکردگی پورے ملک کی کامیابی ہے۔ اسی طرح ایشین ایتھلیٹکس فیڈریشن کے نائب صدر محمد اکرم ساہی اور پاکستان ایتھلیٹکس فیڈریشن کے صدر وجاہت حسین ساہی نے بھی دونوں کھلاڑیوں کے شاندار کھیل کو سراہا۔
جیولن تھرو کے علاوہ پاکستان نے باکسنگ میں بھی نمایاں کامیابی حاصل کی ہے۔ باکسر قدرت اللہ نے 55 کلوگرام کیٹیگری میں اور فاطمہ زہرا نے 60 کلوگرام ایونٹ میں کانسی کے تمغے جیتے، جن کے لیے 20، 20 لاکھ روپے انعام مقرر کیا گیا ہے۔
میڈلسٹ کھلاڑیوں کی حوصلہ افزائی کے لیے جلد ایک خصوصی تقریب منعقد کی جائے گی۔
