کراچی پولیس نے خواتین کے موبائل فونز اور سوشل میڈیا اکاؤنٹس ہیک کرکے انہیں بلیک میل کرنے والے ملزم کو گرفتار کر لیا۔ ملزم مختلف خواتین کو ہراساں کرنے، دھمکانے اور رقم بٹورنے جیسے سنگین جرائم میں ملوث پایا گیا ہے۔
پولیس کے مطابق ملزم لنکس بھیج کر خواتین کے موبائل فونز اور سوشل میڈیا اکاؤنٹس تک رسائی حاصل کرتا تھا۔ اکاؤنٹس ہیک کرنے کے بعد وہ خواتین کے نمبرز اکٹھے کرتا اور پھر واٹس ایپ پر پیغامات اور کالز کے ذریعے انہیں دھمکاتا تھا۔
تحقیقات میں انکشاف ہوا کہ ملزم خواتین کو لالچ اور خوفزدہ کرکے اپنی پسند کی جگہ پر بلاتا، وہاں ان کی ویڈیوز بناتا تھا اور بعد ازاں انہی ویڈیوز کو وائرل کرنے کی دھمکی دے کر ان سے بدفعلی اور پیسے بٹورتا تھا۔ پولیس کے مطابق متعدد خواتین اس شخص کے ہتھکنڈوں کا شکار بن چکی ہیں۔
پولیس نے کارروائی کرتے ہوئے ملزم سمیر خان کو عیدگاہ تھانے کی حدود سے گرفتار کیا۔ اس کے قبضے سے دو موبائل فونز اور غیر اخلاقی ویڈیوز برآمد ہوئی ہیں۔ ملزم کے خلاف مقدمہ درج کر لیا گیا ہے جبکہ مزید تحقیقات جاری ہیں۔
