وزیراعظم شہباز شریف نے ٹرائی نیشن سیریز میں شریک ٹیموں کے اعزاز میں ظہرانہ دیا، جس میں پاکستان، سری لنکا اور زمبابوے کے کھلاڑیوں نے شرکت کی۔ اس موقع پر خطاب کرتے ہوئے وزیراعظم نے کہا کہ تینوں ٹیموں نے جس جذبے اور لگن کے ساتھ سیریز میں حصہ لیا، وہ قابلِ تعریف ہے۔
انہوں نے کہا کہ کھلاڑی اپنے اپنے ملک کی شاندار نمائندگی کر رہے ہیں اور امید ہے کہ وہ اسپورٹس مین اسپرٹ کی ایسی مثال قائم کریں گے جو نوجوان نسل کے لیے مشعلِ راہ بنے گی۔
وزیراعظم نے بتایا کہ چیئرمین پی سی بی کی سربراہی میں بورڈ تمام میچز بہترین انتظامات کے ساتھ منعقد کر رہا ہے، جس سے ثابت ہوتا ہے کہ پاکستان میں مسلسل بین الاقوامی کرکٹ کا انعقاد ملک کے مثبت تشخص اور امن و استحکام کی واضح علامت ہے۔
ان کا کہنا تھا کہ ٹرائی نیشن سیریز سے کرکٹ کے شائقین کو اعلیٰ درجے کا کھیل دیکھنے کو ملے گا، جو نہ صرف کھیل کے فروغ بلکہ پاکستان کے مثبت امیج کے لیے اہم ہے۔
