ایران نے بھارتی شہریوں کے لیے ویزا فری انٹری بند کرنے کا باضابطہ اعلان کر دیا ہے، جس کے بعد اب بھارتی شہری بغیر ویزا ایران میں داخل نہیں ہو سکیں گے۔
بھارتی میڈیا کے مطابق بھارت اور ایران کے درمیان سفری قواعد میں بڑی تبدیلی کی گئی ہے، اور ایران نے بھارتی پاسپورٹ ہولڈرز کو دی جانے والی یک طرفہ ویزا فری سہولت ختم کرنے کا فیصلہ کیا ہے۔
رپورٹس کے مطابق ایران یہ اقدام اُن متعدد واقعات کے بعد کر رہا ہے جن میں بھارتی شہریوں کو جھوٹی ملازمت کے وعدوں یا بیرونِ ملک اسمگلنگ (ڈنکی روٹ) کے بہانے ایران بلایا گیا، جہاں پہنچنے پر کئی افراد کو اغوا کر کے تاوان طلب کیا گیا۔
بھارتی وزارتِ خارجہ کا کہنا ہے کہ ان شکایات کے بعد ایرانی حکومت نے عام بھارتی پاسپورٹ رکھنے والے مسافروں کے لیے ویزا چھوٹ کی سہولت 22 نومبر سے معطل کرنے کا فیصلہ کیا ہے۔ وزارتِ خارجہ کے مطابق یہ قدم اس سہولت کے مجرمانہ استعمال کو روکنے کے لیے اٹھایا گیا ہے۔
نئے ضوابط کے تحت 22 نومبر کے بعد بھارتی شہریوں کو ایران میں داخل ہونے یا وہاں سے کسی تیسرے ملک کا سفر جاری رکھنے کے لیے پیشگی ویزا حاصل کرنا لازمی ہوگا۔
