بھارتی آرمی چیف جنرل اپیندر دویدی نے ایک بار پھر جارحانہ بیان دیتے ہوئے کہا ہے کہ آپریشن سندور 1.0 دراصل ’’صرف ایک ٹریلر‘‘ تھا جو 88 گھنٹوں میں مکمل ہو گیا، جبکہ اصل کارروائی ابھی شروع بھی نہیں ہوئی۔
چانکیا ڈیفنس ڈائیلاگ کے دوران جب ان سے آپریشن سندور کے نتائج سے متعلق سوال کیا گیا تو انہوں نے طنزیہ انداز میں کہا کہ ’’1.0 تو بس ٹریلر تھا، فلم شروع ہونا ابھی باقی ہے۔‘‘ ان کے مطابق آپریشن کی مختصر مدت بھارت کی تیاری اور صلاحیت کا ثبوت ہے۔
جنرل دویدی کا کہنا تھا کہ بھارت خطے میں پیدا ہونے والے آئندہ ممکنہ حالات کے لیے پوری طرح تیار ہے۔ ان کے بقول اگر پاکستان ایسی کوئی صورتحال دوبارہ پیدا کرتا ہے تو بھارت اسے یہ سکھانے کی پوزیشن میں ہے کہ ایک ذمہ دار ملک اپنے ہمسایہ ممالک کے ساتھ کیسا رویہ اختیار کرتا ہے۔
بھارتی آرمی چیف کے اس بیان کو خطے میں کشیدگی بڑھانے والا قرار دیا جا رہا ہے، جبکہ پاکستان کی جانب سے اس پر تاحال کوئی ردعمل سامنے نہیں آیا۔
