پاکستانی شوبز انڈسٹری کی سینئر اداکارہ سیمی راحیل نے پاکستانی ایوارڈ شوز کو جعلی اور غیر منصفانہ قرار دیا ہے۔ نجی ٹی وی پروگرام میں گفتگو کرتے ہوئے انہوں نے کہا کہ جب پاکستان جیسے ملک میں انتخابات کے اصل نتائج بھی شفاف نہیں ہوتے، تو ایوارڈ شوز کی ووٹنگ پر بھروسہ کیسے کیا جا سکتا ہے۔
سیمی راحیل نے مزید کہا کہ امریکا جیسے ترقی یافتہ ملک میں بھی ووٹنگ کے عمل پر اثرات پڑے ہیں، اس لیے یہ ووٹنگ حقیقی نہیں مانی جا سکتی۔ ان کا کہنا تھا کہ ہر شخص نے اپنی پسند کے مطابق لوگوں کو ایوارڈ دے دیا ہے، جس سے ایسے ایوارڈز جعلی لگتے ہیں اور ان میں حقیقی میرٹ نظر نہیں آتا۔
انہوں نے یہ بھی بتایا کہ اکثر چینلز نے اپنی پسند کے مطابق ایوارڈ سسٹم بنایا ہوا ہے، جہاں ایوارڈز کی تقسیم اکثر تعصب اور ذاتی پسند کی بنیاد پر کی جاتی ہے۔ سیمی راحیل کے مطابق اس صورتحال کی وجہ سے پاکستانی ایوارڈ شوز کی ساکھ متاثر ہوئی ہے اور ان میں انصاف کا فقدان ہے۔
