ٹرمپ نے آئندہ ہفتے سعودی ولی عہد سے ملاقات کی تصدیق کردی

امریکی صدر ڈونلڈ ٹرمپ نے تصدیق کی ہے کہ وہ آئندہ ہفتے سعودی ولی عہد سے ملاقات کریں گے۔ ائیر فورس ون میں صحافیوں سے گفتگو کرتے ہوئے انہوں نے کہا کہ یہ ملاقات صرف ایک رسمی ملاقات نہیں ہوگی بلکہ اس سے آگے بڑھ کر اہم امور پر بات چیت ہوگی۔

صحافی کے سوال پر کہ کیا سعودی عرب کو ایف-35 طیارے فروخت کرنے کا فیصلہ کیا گیا ہے، ٹرمپ نے بتایا کہ سعودی عرب بڑی تعداد میں ایف-35 اور دیگر لڑاکا طیارے خریدنے کا خواہشمند ہے۔ انہوں نے مزید کہا کہ امریکا دنیا کے بہترین طیارے اور میزائل تیار کرتا ہے۔

ابراہیمی معاہدوں کے بارے میں سوال پر امریکی صدر نے کہا کہ یہ معاہدے بھی ملاقات میں زیر غور آئیں گے اور امید ہے کہ سعودی عرب جلد ابراہیمی معاہدے میں شامل ہو جائے گا۔