وفاقی دارالحکومت کی طبی تاریخ میں ایک اہم سنگِ میل عبور کرتے ہوئے پمز اسپتال میں پہلی روبوٹک سرجری کامیابی سے مکمل کر لی گئی۔
اس سرجری کے لیے جدید ٹومائے سرجیکل روبوٹ استعمال کیا گیا، جبکہ اس عمل میں برطانیہ کے بین الاقوامی ماہرین نے بھی شرکت کی۔ سرجری کی رہنمائی پمز کے پروفیسر شمیم خان، پروفیسر متین شریف اور ڈاکٹر جاوید برکی نے کی، جبکہ ماہرینِ سرجری ڈاکٹر عاطف انعام شامی، ڈاکٹر برہان الحق اور ڈاکٹر خالد سعید بھی ٹیم کا حصہ تھے۔
ڈائریکٹر روبوٹک سرجری ڈاکٹر متین شریف نے میڈیا سے گفتگو میں کہا کہ روبوٹک سرجری کے ذریعے اب پیچیدہ آپریشنز پہلے سے زیادہ محفوظ، مؤثر اور کم وقت میں مکمل کیے جا سکیں گے۔ ان کے مطابق "ٹومائے” نامی یہ روبوٹ چین میں تیار کیا گیا ہے اور اب مقصد ہے کہ روبوٹک سرجری کا نظام پورے پاکستان میں متعارف کرایا جائے۔
ڈاکٹر متین شریف نے بتایا کہ حکومت کی مکمل حمایت حاصل ہے، اور حالیہ آپریشن ایک خاتون مریضہ پر کامیابی سے انجام دیا گیا۔ ان کا کہنا تھا کہ روبوٹک ٹیکنالوجی کی بدولت مریض پہلے کے مقابلے میں زیادہ جلد صحتیاب ہو سکتے ہیں۔
