پاکستان تحریک انصاف (پی ٹی آئی) کے سینیٹر سیف اللّٰہ ابڑو نے سینیٹ کی رکنیت سے استعفیٰ دے دیا۔ انہوں نے سینیٹ میں اظہار خیال کرتے ہوئے کہا کہ وہ آج اپنی رکنیت سے دستبردار ہو رہے ہیں۔ چیئرمین سینیٹ یوسف رضا گیلانی نے جواب میں کہا کہ وہ انہیں دوبارہ سینیٹر بنا دیں گے۔
سیف اللّٰہ ابڑو نے اپنی تقریر میں کہا کہ پاک بھارت جنگ میں پاکستان کی فتح سب کے لیے فخر کا باعث ہے اور امریکی صدر نے ہمارے فیلڈ مارشل کو جو عزت دی، کسی صدر یا وزیراعظم کو نہیں دی۔ انہوں نے یاد دلایا کہ 26ویں آئینی ترمیم کے دوران ان کی بیگم گرفتار ہوئی تھی اور ان کے 10 خاندان کے افراد کو اٹھایا گیا تھا، لیکن کسی پی ٹی آئی رکن نے ان کے لیے آواز نہیں اٹھائی۔
سینیٹ میں 27ویں آئینی ترمیم منظور کر لی گئی، جس کے حق میں 64 ارکان نے ووٹ دیا۔ اس سے قبل ترمیم کی 59 شقوں کی مرحلہ وار منظوری دی گئی تھی۔ وزیر قانون اعظم نذیر تارڑ نے آئینی ترمیمی بل پیش کرنے کی تحریک پیش کی۔
سینیٹ نے دوتہائی اکثریت سے 27 ویں آئینی ترمیم منظور کرلی
پی ٹی آئی کے ارکان نے چیئرمین سینیٹ کے ڈائس کے سامنے احتجاج کیا، تاہم سینیٹر سیف اللّٰہ ابڑو نشست پر بیٹھے رہے اور ترمیم کے حق میں ووٹ دیا۔ جمعیت علماء اسلام کے سینیٹر احمد خان نے بھی 27ویں آئینی ترمیم کے حق میں ووٹ دیا، جس کے نتیجے میں حکومت کو سینیٹ میں مطلوبہ 64 ووٹ مل گئے۔
