قومی وطن پارٹی کے چیئرمین آفتاب احمد خان شیرپاؤ نے وزیراعلیٰ خیبر پختونخوا سہیل آفریدی کے فوج مخالف اور نفرت انگیز بیان پر سخت ردعمل کا اظہار کیا ہے۔
آفتاب احمد شیرپاؤ نے سماجی رابطے کی ویب سائٹ ’ایکس‘ پر اپنے بیان میں کہا کہ وزیراعلیٰ خیبر پختونخوا کا حالیہ بیان نہ صرف غیر ذمہ دارانہ ہے بلکہ یہ عوامی جذبات اور فرقہ وارانہ نفرت کو ہوا دے سکتا ہے۔
انہوں نے کہا کہ پاک فوج دہشت گردی کے خلاف جنگ میں اپنی جانوں کے نذرانے پیش کر رہی ہے اور ملک کی سرحدوں کی حفاظت کے لیے ہر وقت چوکس ہے۔ ایسے میں سیاسی رہنماؤں کو قومی اداروں کے خلاف بیانات دینے سے گریز کرنا چاہیے۔
آفتاب شیرپاؤ نے وزیراعلیٰ خیبر پختونخوا کے ترجمان کی جانب سے جاری وضاحت کو بھی ناکافی قرار دیا اور کہا کہ سہیل آفریدی کو بطور وزیراعلیٰ صوبے کے عوامی مسائل پر توجہ دینی چاہیے۔
انہوں نے مزید کہا کہ وزیراعلیٰ جیسے اہم عہدے پر فائز شخص کو دانشمندی، بردباری اور ذمہ داری کا مظاہرہ کرنا چاہیے، کیونکہ اس کے الفاظ صوبے اور ملک دونوں پر اثر انداز ہوتے ہیں۔
