پنجاب کی وزیر اطلاعات و ثقافت عظمیٰ بخاری نے بتایا ہے کہ "اپنی چھت اپنا گھر” پراجیکٹ کے تحت روزانہ 290 گھر تعمیر ہو رہے ہیں۔ اس منصوبے کے تحت اب تک 30 ہزار گھر مکمل ہو چکے ہیں اور ایک لاکھ چار ہزار آٹھ سو خاندانوں کو قرضے فراہم کیے جا چکے ہیں۔
الحمراء میں میڈیا سے گفتگو کرتے ہوئے عظمیٰ بخاری نے کہا کہ آج سے وزیراعلیٰ پنجاب کے مختلف منصوبوں کی تفصیلات عوام کے ساتھ شیئر کی جائیں گی، جن میں سولہ منصوبوں پر خاص روشنی ڈالی جائے گی۔
انہوں نے بتایا کہ سیلاب متاثرین میں دس ملین سے زائد روپے مالی معاونت کے طور پر تقسیم کیے جا چکے ہیں اور تمام متاثرین کو دو ماہ کے اندر مالی مدد فراہم کی جائے گی۔
صوبائی وزیر نے دیگر اہم منصوبوں کی بھی تفصیلات دیں
ستھرا پنجاب پروگرام: 1 لاکھ 40 ہزار افراد کو روزگار فراہم کیا، 94 ہزار ٹن ویسٹ اٹھایا گیا۔
الیکٹرک بسیں: 42 شہروں میں 1,100 بسیں چلیں گی، دوسرا فیز دسمبر میں مکمل ہوگا۔
خصوصی افراد کے لیے معاون آلات: پہلے فیز میں ایک بچے کو مصنوعی بازو فراہم کیا گیا۔
بلا سود موٹرسائیکل پروگرام: 27 ہزار بائیکس تقسیم کی گئیں۔
واسا کے توسیعی منصوبے: پنجاب کے 38 شہروں میں پانی کی سہولیات کو بڑھایا گیا۔
دھی رانی پروگرام: 5 ہزار شادیوں کا انعقاد کیا گیا۔
صحت و تعلیم: 7 ہزار بچوں کی ہارٹ سرجریز ہو چکی ہیں، کلینک ان وہیلز سے لاکھوں افراد مستفید ہوئے، کئی ڈی ایچ کیوز اور بی ایچ کیوز کو ری ویمپ کیا گیا، سرگودھا کارڈیالوجی اسپتال مکمل، لاہور میں کینسر اسپتال تکمیل کے قریب۔
عظمیٰ بخاری نے کہا کہ اسموگ کنٹرول پروگرام اور گرین ٹریکٹر پروگرام سے ماحول اور کسانوں کو فائدہ پہنچا ہے، جبکہ طلباء کے لیے انٹرن شپ پروگرام جاری ہے۔
اپنی چھت اپنا گھر منصوبہ عام آدمی کیلئے ریاست ماں جیسا احساس ہے، مریم نواز
