13
وزیراعلیٰ خیبرپختونخوا سہیل آفریدی اسلام آباد ہائی کورٹ سے بانی پاکستان تحریک انصاف سے ملاقات کی اجازت حاصل کرنے کے باوجود اڈیالہ جیل پہنچ کر ان سے ملاقات نہ کر سکے۔
پولیس نے انہیں داہگل ناکے پر روک دیا، جس کے بعد سہیل آفریدی نے وہاں علامتی دھرنا دے دیا۔
وزیراعلیٰ سہیل آفریدی نے عدالت کی جانب سے ملاقات کی اجازت ملنے کے بعد اڈیالہ جیل کا رخ کیا تھا لیکن پولیس نے انہیں مزید آگے جانے سے روک دیا۔
اس پر وہ سڑک پر بیٹھ گئے اور احتجاج شروع کر دیا، انہوں نے کہا کہ ان کے پاس عدالتی اجازت نامہ ہے اور بانی سے ملاقات ان کا قانونی حق ہے۔
موقع پر پولیس کی بھاری نفری تعینات تھی، حالات کشیدہ مگر قابو میں بتائے جا رہے ہیں۔ علامتی دھرنے کے بعد سہیل آفریدی کارکنوں سمیت وہاں سے واپس روانہ ہوگئے۔
یہ واقعہ ایسے وقت پیش آیا ہے جب سیاسی کشیدگی بڑھتی جا رہی ہے اور رہنماؤں کی ملاقاتوں پر پابندیاں معمول بنتی جا رہی ہیں۔
