لاہور ایک بار پھر دنیا کے آلودہ ترین شہروں کی فہرست میں سرفہرست آگیا ہے۔ ماحولیاتی اداروں کی جاری کردہ تازہ رپورٹ کے مطابق پیر کی صبح لاہور کا فضائی معیار انتہائی خراب ریکارڈ کیا گیا، جس کے باعث شہریوں کی صحت کو سنگین خطرات لاحق ہو چکے ہیں۔
ماحولیاتی تحفظ کے قومی ادارے کے مطابق لاہور کا ایئر کوالٹی انڈیکس (AQI) 332 تک پہنچ چکا ہے، جو ایک خطرناک سطح ہے۔ اس فہرست میں فیصل آباد 325 کی AQI کے ساتھ دوسرے نمبر پر، جبکہ شیخوپورہ 311، ڈیرہ غازی خان 239، گوجرانوالہ 233 اور ملتان 224 کے ساتھ شامل ہیں۔
محکمہ ماحولیات کے مطابق AQI اگر 0 سے 100 کے درمیان ہو تو یہ فضا کو صاف یا قابل قبول ظاہر کرتا ہے۔ 101 سے 200 تک کی سطح نسبتاً آلودہ مگر برداشت کے قابل سمجھی جاتی ہے۔ تاہم جب انڈیکس 300 سے تجاوز کرے تو یہ فضا کو انتہائی آلودہ اور انسانی صحت کے لیے خطرناک قرار دیا جاتا ہے۔
فضا میں آلودگی کے موجودہ خطرناک حد تک پہنچنے سے بالخصوص دل اور پھیپھڑوں کے مریضوں کو سانس لینے میں شدید دشواری کا سامنا ہو سکتا ہے۔ طویل مدت تک اس کیفیت میں رہنا نہ صرف بیمار افراد بلکہ صحت مند شہریوں کی صحت پر بھی منفی اثر ڈال سکتا ہے۔
لاہور میں اسموگ شدت اختیار کر گئی، شہریوں کو گھروں میں رہنے کی ہدایت
حکومت پنجاب اور دیگر متعلقہ اداروں کی جانب سے مختلف اقدامات، جیسے اینٹی اسموگ گنز، اٹھائے جا رہے ہیں تاہم ماہرین کے مطابق اس مسئلے کا مستقل حل بڑے پیمانے پر شجر کاری، صنعتی اخراج کی نگرانی، اور ٹریفک کے نظام میں بہتری سے ہی ممکن ہے۔
ڈاکٹرز اور ماحولیاتی ماہرین شہریوں کو تلقین کرتے ہیں کہ وہ غیر ضروری طور پر گھروں سے باہر نکلنے سے گریز کریں، ماسک کا استعمال کریں، اور ہوا صاف رکھنے والے آلات کا استعمال کریں تاکہ خود کو اور اپنے خاندان کو فضائی آلودگی کے مہلک اثرات سے بچایا جا سکے۔
