لاہور: بڑھتی ہوئی اسموگ کے باعث ضلعی انتظامیہ نے شہریوں کو غیر ضروری طور پر گھروں سے باہر نہ نکلنے کی ہدایت جاری کر دی ہے۔
اسموگ مانیٹرنگ سینٹر کے مطابق مشرقی ہواؤں کے باعث آج شہر میں فضائی آلودگی کی شدت برقرار رہنے کا امکان ہے، اور اوسط ایئر کوالٹی انڈیکس (AQI) 195 سے 210 کے درمیان رہنے کی پیشگوئی کی گئی ہے۔
ماہرین کے مطابق صبح کے اوقات میں کم درجہ حرارت کی وجہ سے آلودہ ذرات زیادہ دیر تک فضا میں معلق رہیں گے، جس سے سانس اور آنکھوں کی بیماریوں میں اضافہ ہو سکتا ہے۔
انتظامیہ نے بتایا کہ زیادہ آلودگی والے علاقوں میں اینٹی اسموگ گنز کا استعمال کیا جائے گا تاکہ فضا میں موجود ذرات کو کم کیا جا سکے۔
یاد رہے کہ گزشتہ روز پنجاب کی سینئر وزیر مریم اورنگزیب نے بتایا تھا کہ کاہنہ، لاہور میں پہلی بار اسموگ گن کا کامیاب تجربہ کیا گیا، جس سے فضائی آلودگی میں 70 فیصد کمی ریکارڈ کی گئی اور ایئر کوالٹی انڈیکس 666 سے کم ہو کر 170 تک آ گیا۔
مریم اورنگزیب کے مطابق اسموگ گنز کا استعمال آئندہ دنوں میں شہر کے اُن علاقوں میں کیا جائے گا جہاں فضائی آلودگی کی سطح سب سے زیادہ ہے۔
