چیئرمین پیپلز پارٹی بلاول بھٹو زرداری نے گورنر خیبرپختونخوا فیصل کریم کنڈی کو فوری طور پر صوبے میں جا کر نومنتخب وزیراعلیٰ سہیل آفریدی سے حلف لینے کی ہدایت دی ہے۔ انہوں نے ساتھ ہی وزیراعلیٰ سندھ سے بھی درخواست کی ہے کہ گورنر کے سفر کے لیے اپنا سرکاری طیارہ فراہم کریں تاکہ آئینی عمل میں کسی قسم کی تاخیر نہ ہو۔
بلاول بھٹو کی جانب سے ہدایت ملنے کے بعد میڈیا سے بات کرتے ہوئے گورنر فیصل کریم کنڈی نے کہا کہ انہوں نے کبھی آئینی ذمے داری سے انکار نہیں کیا اور ہمیشہ قانون کے مطابق عمل کیا ہے۔ ان کا کہنا تھا کہ ان کا جواب پہلے ہی پشاور ہائیکورٹ میں جمع ہو چکا ہے، اور وہ آج رات کسی بھی وقت خیبرپختونخوا روانہ ہو سکتے ہیں۔
گورنر نے واضح کیا کہ ان کے پاس ذاتی طیارہ نہیں ہوتا، اسی لیے انہوں نے وزیراعلیٰ سندھ سے درخواست کی ہے کہ سفر کے لیے جہاز فراہم کیا جائے۔
میں نے کبھی نہیں کہا حلف نہیں لوں گا، گورنر خیبرپختونخوا فیصل کریم کنڈی
پشاور ہائیکورٹ نے نومنتخب وزیراعلیٰ سہیل آفریدی سے حلف نہ لیے جانے پر ازخود نوٹس لیتے ہوئے گورنر خیبرپختونخوا کو ہدایت دی ہے کہ وہ بدھ کی شام 4 بجے تک حلف لیں۔ عدالت نے واضح کیا ہے کہ اگر گورنر حلف نہ لیں تو اسپیکر اسمبلی یہ ذمے داری انجام دیں تاکہ آئینی تسلسل میں خلل نہ آئے۔
فیصلے میں کہا گیا ہے کہ سابق وزیراعلیٰ علی امین گنڈاپور نے خود اسمبلی میں استعفے کا اعلان کیا تھا، اور اسمبلی نئے وزیراعلیٰ کا انتخاب کر چکی ہے، اس لیے حلف لینے میں مزید تاخیر نہیں کی جا سکتی۔
