ملک بھر میں عوام کے لیے ایک اچھی خبر سامنے آئی ہے، کیونکہ 16 اکتوبر 2025 سے پٹرولیم مصنوعات کی قیمتوں میں نمایاں کمی کا امکان ظاہر کیا جا رہا ہے۔ ذرائع کے مطابق، پیٹرول کی قیمت میں 6 روپے 10 پیسے فی لیٹر اور ہائی اسپیڈ ڈیزل کی قیمت میں 97 پیسے فی لیٹر کمی متوقع ہے۔
اسی طرح مٹی کے تیل کی قیمت میں 2 روپے 75 پیسے اور لائٹ ڈیزل آئل کی قیمت میں 1 روپے 64 پیسے فی لیٹر کمی کا امکان ہے۔ پٹرولیم مصنوعات کی قیمتوں میں اس متوقع کمی کا تعلق عالمی منڈی میں خام تیل کی قیمتوں میں حالیہ کمی سے جوڑا جا رہا ہے۔
ذرائع کا کہنا ہے کہ اوگرا نے قیمتوں میں ردوبدل کی سمری تیار کر کے پٹرولیم ڈویژن کے ذریعے وزارت خزانہ کو بھیج دی ہے، جس پر وزیراعظم سے مشاورت کے بعد 15 اکتوبر کو حتمی منظوری دی جائے گی۔
واضح رہے کہ عالمی منڈی میں برطانوی خام تیل کی قیمت میں 2.45 ڈالر کمی کے بعد فی بیرل نرخ 65.35 ڈالر سے کم ہو کر 62.77 ڈالر ہو گیا ہے، جو کہ 3.76 فیصد کمی کو ظاہر کرتا ہے۔ دوسری جانب امریکی خام تیل کی قیمت بھی 2.56 ڈالر کم ہو کر 58.95 ڈالر فی بیرل پر آ گئی ہے۔
اقتصادی ماہرین کے مطابق اگر عالمی منڈی میں تیل کی قیمتوں میں کمی کا یہی رجحان برقرار رہا تو آئندہ مہینوں میں بھی پٹرولیم مصنوعات کی قیمتیں مزید کم ہو سکتی ہیں، جس کا براہ راست فائدہ عوام کو پہنچے گا۔
مزید برآں، پٹرولیم مصنوعات کی درآمدات میں بھی سالانہ بنیادوں پر 5 فیصد کمی ریکارڈ کی گئی ہے، جو ملکی کرنٹ اکاؤنٹ پر دباؤ کم کرنے میں مددگار ثابت ہو سکتی ہے۔
