وزیر اعظم شہباز شریف نے کہا ہے کہ ملائیشیا پاکستان کا دوسرا گھر ہے اور دونوں ممالک کے درمیان بہترین تعلقات قائم ہیں۔
کوالالمپور میں ملائیشیا کے وزیر اعظم محمد انور ابراہیم کے ساتھ مشترکہ پریس کانفرنس میں شہباز شریف نے پاکستانی عوام کی طرف سے ملائیشیا میں دیے گئے والہانہ استقبال پر شکریہ ادا کیا۔
شہباز شریف نے کہا کہ ملائیشیا کی ترقی میں انور ابراہیم کا کردار اہم ہے اور ان کے دورہ پاکستان کو یادگار قرار دیا۔ انہوں نے دونوں ممالک کے درمیان مثبت بات چیت کا ذکر کرتے ہوئے کہا کہ پاکستان کے کئی طلبا ملائیشیا میں تعلیم حاصل کر رہے ہیں اور مشترکہ منصوبوں پر کام کرنے کے خواہاں ہیں۔
انہوں نے پاکستان سے 20 کروڑ ڈالر مالیت حلال گوشت کی برآمد کے فیصلے کا خیرمقدم کیا اور کہا کہ حلال گوشت کی تجارت کو مزید فروغ دیا جائے گا۔ اس کے علاوہ، وزیر اعظم نے ملائیشیا کے وزیر اعظم کی کتاب "اسکرپٹ” کی تعریف کی اور کہا کہ یہ کتاب اسلام آباد اور کوالالمپور کے درمیان ایک پل کا کردار ادا کرے گی۔
وزیراعظم شہباز شریف دو روزہ سرکاری دورے پر ملائیشیا روانہ
ملائیشیا کے وزیر اعظم انور ابراہیم نے کہا کہ دہشت گردی پر قابو پانے کے لیے پاکستان سے ہر ممکن تعاون کیا جائے گا اور دونوں ممالک کے تعلقات وقت کے ساتھ مستحکم ہوئے ہیں۔ انہوں نے خطے میں امن کے لیے پاک بھارت تعلقات کی اہمیت پر بھی زور دیا۔
واضح رہے کہ وزیر اعظم شہباز شریف دو روزہ دورے پر ملائیشیا میں موجود ہیں، جہاں ان کا پرتپاک استقبال کیا گیا اور مسلح افواج کی جانب سے گارڈ آف آنر بھی پیش کیا گیا۔
