دبئی میں ہونے والی انٹرنیشنل لیگ ٹی 20 کی پلیئرز نیلامی میں پاکستانی کرکٹرز کی مانگ میں نمایاں اضافہ دیکھا گیا ہے۔ معروف فرنچائز ڈیزرٹ وائپرز نے فاسٹ باؤلر نسیم شاہ اور نوجوان بیٹر حسن نواز کو اپنی ٹیم میں شامل کر لیا ہے۔
نسیم شاہ کو 80 ہزار امریکی ڈالرز جبکہ حسن نواز کو 40 ہزار ڈالرز کے معاہدے کے تحت سائن کیا گیا ہے۔ اس سے قبل، ڈیزرٹ وائپرز نے پاکستانی اوپنر فخر زمان کی خدمات بھی اسی قیمت یعنی 80 ہزار ڈالرز میں حاصل کی تھیں۔
اس طرح ڈیزرٹ وائپرز کی ٹیم میں شامل پاکستانی کھلاڑیوں کی تعداد تین ہو گئی ہے، جو انٹرنیشنل لیگ میں پاکستان کی بھرپور نمائندگی کا عندیہ دے رہی ہے۔
ذرائع کے مطابق ان کھلاڑیوں کی شرکت اب پاکستان کرکٹ بورڈ (پی سی بی) کی جانب سے این او سی (No Objection Certificate) یعنی اجازت نامے کے اجرا سے مشروط ہے۔ پی سی بی کی حتمی منظوری کے بعد ہی یہ کھلاڑی لیگ میں ایکشن میں نظر آئیں گے۔
انٹرنیشنل لیگ میں پاکستانی کھلاڑیوں کی مقبولیت بڑھتی ہوئی دکھائی دے رہی ہے، جو ان کے بین الاقوامی معیار اور کارکردگی کا منہ بولتا ثبوت ہے۔
