بھارتی ریاست اترپردیش کے ضلع جونپور میں ایک غیر معمولی واقعہ پیش آیا جہاں 75 سالہ کسان نے 35 سالہ خاتون سے شادی کی، لیکن اگلی ہی صبح انتقال کر گیا۔ واقعے نے نہ صرف گاؤں کے لوگوں کو حیران کر دیا بلکہ سنگرو رام کے اہلِ خانہ کو بھی شکوک و شبہات میں مبتلا کر دیا۔
رپورٹس کے مطابق سنگرو رام پیشے کے لحاظ سے ایک کسان تھا، جس کی پہلی اہلیہ ایک سال قبل انتقال کر گئی تھی۔ اس کے بعد سنگرو نے طویل تنہائی کے بعد منبھاوتی نامی خاتون سے دوسری شادی کا فیصلہ کیا۔ اگرچہ گاؤں کے لوگوں نے ان کی عمر کے پیشِ نظر شادی سے منع کیا، مگر وہ اپنی ضد پر قائم رہے اور کورٹ میرج کر کے مندر میں سادہ تقریب کے ذریعے رشتہ ازدواج میں منسلک ہو گئے۔
منبھاوتی کی بھی یہ دوسری شادی تھی، جس کے پہلے شوہر سے دو بیٹیاں اور ایک بیٹا ہے۔ شادی سے قبل سنگرو رام نے منبھاوتی کو یقین دہانی کروائی تھی کہ وہ نہ صرف اس کا خیال رکھے گا بلکہ اس کے بچوں کی دیکھ بھال بھی خود کرے گا۔
بھارتی عدالت کی ڈاکٹروں کو سخت ہدایت: لکھائی کو پڑھنے کے قابل بنائیں
تاہم شادی کے صرف چوبیس گھنٹے بعد ہی ایک افسوسناک موڑ آ گیا۔ منبھاوتی کے مطابق، اگلی صبح سنگرو رام کی طبیعت اچانک بگڑ گئی۔ انہیں فوری طور پر قریبی اسپتال منتقل کیا گیا، مگر ڈاکٹرز نے ان کے پہنچنے سے قبل ہی موت کی تصدیق کر دی۔
اس اچانک موت پر سنگرو کے اہل خانہ نے گہرے شکوک کا اظہار کیا اور واقعے کو مشتبہ قرار دیتے ہوئے پولیس میں رپورٹ درج کرائی۔ ان کا مطالبہ ہے کہ واقعے کی مکمل تحقیقات کی جائیں تاکہ کسی ممکنہ سازش یا مجرمانہ فعل کا پتا چل سکے۔
پولیس نے واقعے کا نوٹس لیتے ہوئے لاش کو پوسٹ مارٹم کے لیے اسپتال بھیج دیا ہے، اور تفتیش شروع کر دی گئی ہے۔ اب دیکھنا یہ ہے کہ یہ محض ایک طبعی موت تھی یا اس کے پیچھے کوئی گہری سازش چھپی ہوئی ہے۔
