کراچی سے موصول ہونے والی اطلاعات کے مطابق پاکستان اسٹیل ملز کے جنرل مینیجر اسٹورز سید سعادت علی کو قیمتی سامان چوری کرنے کے الزام میں بن قاسم پولیس نے گرفتار کرلیا ہے۔
پولیس نے کارروائی خفیہ اطلاع پر کی، جس کے نتیجے میں 40 کلوگرام تانبہ اور چوری میں استعمال ہونے والی گاڑی بھی برآمد کرلی گئی ہے۔
پولیس ذرائع کے مطابق گرفتار ملزم سعادت علی اسٹیل ملز کے اے سی ٹی سی ڈپارٹمنٹ میں بطور جنرل مینیجر کام کر رہا تھا اور چار محکموں کا جی ایم ہونے کی حیثیت سے اسے وسیع اختیارات حاصل تھے۔
پولیس کا کہنا ہے کہ سعادت علی مبینہ طور پر چوری شدہ قیمتی سامان، خاص طور پر تانبا، مذکورہ گاڑی کے ذریعے خفیہ طور پر مل کے احاطے سے باہر منتقل کرتا اور پھر اسے مختلف گوداموں میں فروخت کر دیتا تھا۔
حکام کے مطابق برآمد کیا گیا تانبہ لاکھوں روپے مالیت کا ہے، جب کہ ملزم کے دیگر ممکنہ ساتھیوں کی تلاش جاری ہے۔ بن قاسم پولیس نے ملزم کے خلاف مقدمہ درج کرلیا ہے اور مزید تفتیش کا عمل جاری ہے، جس میں یہ بھی دیکھا جا رہا ہے کہ آیا چوری میں دیگر افسران یا عملہ بھی ملوث ہے یا نہیں۔
