ایشیا کپ 2025 کے فائنل سے قبل پاکستان اور بھارت کی ٹیموں کے درمیان بڑھتے ہوئے تناؤ کے باعث روایتی ٹرافی فوٹو شوٹ منسوخ کر دیا گیا ہے۔
منتظمین کی جانب سے جاری بیان میں کہا گیا ہے کہ آج کپتانوں کا فوٹو شوٹ شیڈول نہیں ہوگا، جبکہ اتوار کو فائنل سے قبل اس حوالے سے حتمی فیصلہ کیا جائے گا۔
ذرائع کے مطابق بھارتی ٹیم کی جانب سے پاکستان کے خلاف گزشتہ دو میچوں میں کھلاڑیوں کا ہاتھ نہ ملانے کے واقعات نے دونوں ٹیموں کے درمیان کشیدگی کو مزید ہوا دی ہے، اور فائنل میں بھی اسی رویے کے امکانات ظاہر کیے جا رہے ہیں۔
دوسری جانب پاکستان ٹیم کے کپتان سلمان علی آغا آج شام سات بجے پریس کانفرنس کریں گے، جس میں وہ فائنل سے متعلق ٹیم کی تیاریوں اور حکمت عملی پر بات کریں گے۔
پاکستانی ٹیم فائنل سے قبل اپنی پریکٹس کا سلسلہ جاری رکھے ہوئے ہے، اور آج شام پاکستانی وقت کے مطابق سات سے دس بجے دبئی کی آئی سی سی اکیڈمی میں نیٹ پریکٹس کرے گی۔
ایشیا کپ فائنل میں بھارت کے خلاف مائیک ہیسن کا قومی ٹیم کو اہم پیغام
واضح رہے کہ پاکستان اور بھارت کے درمیان ایشیا کپ کے فائنل مقابلے کو دنیا بھر کے شائقین کرکٹ شدت سے دیکھ رہے ہیں، لیکن میدان سے باہر کی کشیدگی اس بڑے میچ پر سایہ ڈال رہی ہے۔
