پاکستان پیپلز پارٹی نے وزیراعلیٰ پنجاب مریم نواز کے حالیہ بیانات کو شدید تنقید کا نشانہ بناتے ہوئے انہیں تنگ نظری پر مبنی اور تفرقہ پیدا کرنے والا قرار دیا ہے۔
پی پی رہنما شازیہ مری نے کہا کہ پاکستان جیسے نازک حالات سے گزرنے والے ملک میں کھوکھلے بیانیے کی کوئی گنجائش نہیں، مریم نواز کو خدمت پر توجہ دینی چاہیے نہ کہ ایسی باتوں پر جو سیاسی انتشار کا باعث بنیں۔
انہوں نے واضح کیا کہ چیئرمین بلاول بھٹو ہمیشہ سیلاب متاثرین کی مدد پر فوکس کرتے رہے ہیں اور ریلیف کی اپیل سیاست نہیں بلکہ انسانیت کا تقاضا ہے۔ ان کا کہنا تھا کہ لوگ اب بھی پانی میں پھنسے ہوئے ہیں اور مدد کے منتظر ہیں، ان کے لیے آواز اٹھانا ہر سیاسی اور انسانی جماعت کی ذمہ داری ہے۔
"جوس کے ڈبے پر تصویریں لگانا اور ٹک ٹاک بنانا ریلیف نہیں سیاست ہے”
پنجاب کی طرف اٹھنے والی انگلی توڑ دوں گی،مریم نواز کا سخت موقف
شازیہ مری نے مسلم لیگ (ن) کو نشانہ بناتے ہوئے کہا کہ:”جو لوگ جوس کے ڈبوں پر اپنی تصویریں لگا کر، ٹک ٹاک ویڈیوز بنا کر اسے ریلیف ورک کہتے ہیں، اصل میں وہی لوگ سیاسی پوائنٹ اسکورنگ کر رہے ہیں۔”
انہوں نے مطالبہ کیا کہ مسلم لیگ (ن) کی پنجاب حکومت دکھاوے کے بجائے اصل خدمت پر توجہ دے۔
بینظیر انکم سپورٹ پروگرام (BISP) کے ذریعے فوری ریلیف کا مطالبہ
پیپلز پارٹی کی رہنما نے وزیراعظم شہباز شریف کی طرف سے بجلی بلوں میں ریلیف اور زرعی ایمرجنسی کے نفاذ جیسے مطالبات تسلیم کیے جانے پر شکرگزاری کا اظہار کیا، لیکن ساتھ ہی یہ بھی سوال اٹھایا کہ:
"اگر بی آئی ایس پی کے ذریعے رمضان پیکیج اور 2022 میں سیلاب متاثرین کو فوری امداد دی گئی تھی، تو اب وہی کامیاب ماڈل کیوں نہیں اپنایا جا رہا؟”
انہوں نے وزیراعظم سے فوری طور پر BISP کے ذریعے کیش امداد کا اعلان کرنے کا مطالبہ کیا تاکہ بے گھر متاثرین کو فوری ریلیف مل سکے۔
