وزیراعظم شہباز شریف نے امریکی صدر ڈونلڈ ٹرمپ سے ملاقات کے دوران انہیں دنیا میں امن کے فروغ کی علامت قرار دیا۔ اس اہم ملاقات کا اعلامیہ وزیراعظم آفس کی جانب سے جاری کیا گیا، جس میں ملاقات کو گرمجوش اور خوشگوار ماحول میں ہونے والی گفتگو سے تعبیر کیا گیا۔
اعلامیے کے مطابق، وزیراعظم نے کہا کہ صدر ٹرمپ دنیا بھر میں جاری تنازعات کے خاتمے کے لیے سنجیدہ، مخلص اور فیصلہ کن کردار ادا کر رہے ہیں۔ انہوں نے صدر ٹرمپ کی قیادت کو "جرات مندانہ، دلیرانہ اور فیصلہ کن” قرار دیتے ہوئے خراج تحسین پیش کیا۔
وزیراعظم شہباز شریف نے اس بات پر زور دیا کہ ٹرمپ کی کوششوں کے نتیجے میں پاکستان اور بھارت کے درمیان فائر بندی ممکن ہو سکی۔ اس کے علاوہ، غزہ میں جاری جنگ کے خاتمے کے لیے بھی صدر ٹرمپ کی کوششوں کو سراہا گیا۔
وزیراعظم شہباز شریف اور صدر ٹرمپ کی خوشگوار ماحول میں ملاقات
اعلامیے میں مزید کہا گیا کہ وزیراعظم نے نیو یارک میں مسلم ممالک کے رہنماؤں کے ساتھ ہونے والی ملاقاتوں کو بھی خوش آئند قرار دیا، جن کا مقصد مشرق وسطیٰ خصوصاً غزہ اور مغربی کنارے میں قیام امن کے لیے مشترکہ حکمت عملی وضع کرنا تھا۔
وزیراعظم نے صدر ٹرمپ کو دورۂ پاکستان کی دعوت بھی دی، جبکہ دونوں رہنماؤں کی ملاقات اوول آفس میں ہوئی، جسے دونوں جانب سے خوشگوار، دوستانہ اور نتیجہ خیز قرار دیا گیا۔
یہ ملاقات ایسے وقت میں ہوئی ہے جب دنیا بھر میں کئی خطوں میں کشیدگی جاری ہے، اور اس تناظر میں صدر ٹرمپ کا عالمی سطح پر امن کی کوششوں میں دلچسپی لینا ایک اہم پیش رفت کے طور پر دیکھا جا رہا ہے۔
