لاہور کے نواحی علاقے رائیونڈ کی بستی امین پورہ میں افسوسناک واقعہ پیش آیا، جہاں پمپ کی مرمت کے دوران چار مزدور سیوریج کے گہرے کنویں میں اترے، تاہم پانی کی زیادتی اور مناسب حفاظتی اقدامات نہ ہونے کے باعث تین مزدور کنویں میں ڈوب کر جاں بحق ہوگئے جبکہ ایک مزدور کو تشویشناک حالت میں بچا لیا گیا۔
ریسکیو 1122 کے ترجمان کے مطابق، حادثہ اس وقت پیش آیا جب مزدور پمپ کی خرابی دور کرنے کے لیے کنویں میں داخل ہوئے۔ مرمت کے دوران پانی اچانک بڑھ گیا، جس سے مزدور کنویں میں پھنس گئے۔ واقعے کی اطلاع ملنے پر ریسکیو ٹیمیں فوری طور پر جائے وقوعہ پر پہنچیں اور امدادی کارروائیاں شروع کیں۔
ریسکیو اہلکاروں نے تقریباً سات گھنٹے طویل ریسکیو آپریشن کے بعد تین مزدوروں کی لاشیں نکالیں، جبکہ چوتھے مزدور کو زخمی حالت میں کنویں سے نکال کر فوری طور پر اسپتال منتقل کیا گیا، جہاں اس کی حالت تشویشناک بتائی جارہی ہے۔
ترجمان ریسکیو کے مطابق جاں بحق ہونے والے مزدوروں کی شناخت نثار، نوید اور آصف کے نام سے ہوئی ہے، جن کی میتیں قانونی کارروائی کے بعد ورثاء کے حوالے کردی جائیں گی۔ واقعے کے بعد علاقے میں فضا سوگوار ہوگئی اور مقامی افراد نے انتظامیہ سے حفاظتی اقدامات بہتر بنانے کا مطالبہ کیا ہے۔
یہ افسوسناک واقعہ اس بات کا ثبوت ہے کہ پبلک ورکس یا نجی سطح پر کام کرنے والے مزدوروں کو اکثر حفاظتی سازوسامان کے بغیر خطرناک حالات میں کام کرنے پر مجبور کیا جاتا ہے، جو کہ ان کی زندگیوں کے لیے شدید خطرہ بن جاتا ہے۔ حکام سے مطالبہ کیا جا رہا ہے کہ اس واقعے کی مکمل تحقیقات کی جائیں اور ذمہ داروں کے خلاف کارروائی کی جائے۔
