لاہور: پاکستان ویمن کرکٹ ٹیم کی بیٹر سدرہ امین نے جنوبی افریقا کے خلاف تین میچوں کی سیریز کے دو میچوں میں مسلسل سنچریاں بنا کر نیا قومی ریکارڈ قائم کیا، لیکن ان کے چھٹے سنچری کے بعد انگلیوں سے 6 کا اشارہ کرنے پر بھارتی شائقین مشتعل ہوگئے۔
رپورٹ کے مطابق سدرہ امین نے پہلے ون ڈے میں 121 رنز اور دوسرے ون ڈے میں 122 رنز بنا کر اپنی چھٹی ون ڈے سنچری مکمل کی۔ یہ کامیابی انہیں لگاتار 2 ون ڈے سنچریاں بنانے والی پہلی پاکستانی اور دوسری ایشین ویمن کرکٹر بناتی ہے۔
پاکستان ویمن ٹیم کی جانب سے اب تک ون ڈے میں کل 10 سنچریاں بنائی گئی ہیں، جن میں سے 6 سدرہ امین کے نام ہیں۔
اپنی چھٹی سنچری مکمل کرنے کے بعد جب سدرہ امین نے انگلیوں کے ذریعے 6 کا اشارہ کیا تو بھارتی شائقین نے سوشل میڈیا پر اس پر شدید ردعمل دیا، بعض نے اسے کھیل میں سیاست گھسیٹنے کے مترادف قرار دیا۔
Pakistan is politicising the game by flashing the 6–0 sign. It was Pakistan women’s cricket team player Sidra Amin who made the gesture after their win. pic.twitter.com/DpIYCC9fvI
— Tejasswi Prakash (@Tiju0Prakash) September 21, 2025
خیال رہے کہ بھارتی شائقین کا یہ ردعمل مئی میں ہونے والے معرکہ حق میں پاک فضائیہ کی جانب سے بھارت کے 6 طیارے مار گرائے جانے کے واقعے سے بھی منسلک کیا جا رہا ہے، جب پاک فضائیہ کے ایر مارشل اورنگزیب احمد نے اعلان کیا تھا کہ پاکستان نے فضائی مقابلے میں بھارت کو 6-0 سے شکست دی۔
