کابل: امریکی صدر ڈونلڈ ٹرمپ کی بگرام ایئر بیس واپس لینے کی دھمکی پر افغان وزارتِ دفاع کے سربراہ فصیح الدین فطرت کا سخت ردعمل سامنے آگیا۔
فصیح الدین فطرت نے کہا کہ بگرام ایئر بیس پر کسی قسم کا معاہدہ ممکن نہیں ہے۔ کچھ لوگ سیاسی ڈیل کے ذریعے ایئر بیس واپس لینا چاہتے ہیں، لیکن افغانستان کی ایک انچ زمین پر بھی کوئی معاہدہ نہیں ہو سکتا۔ انہوں نے زور دے کر کہا کہ افغانستان کی زمین پر کسی معاہدے کی ہمیں ضرورت نہیں۔
یاد رہے کہ صدر ڈونلڈ ٹرمپ متعدد بار یہ مؤقف دہرا چکے ہیں کہ امریکا کو افغانستان کی بگرام ایئر بیس نہیں چھوڑنی چاہیے تھی۔ ان کا کہنا ہے کہ امریکا یہ ایئر بیس واپس لے گا اور اس حوالے سے بات چیت جاری ہے۔ ٹرمپ نے خبردار کیا تھا کہ اگر افغانستان نے بگرام ایئر بیس واپس نہ دی تو اسے سنگین نتائج بھگتنا ہوں گے۔
چند روز قبل چین نے بھی امریکی صدر کے اس بیان پر ردعمل دیتے ہوئے کہا تھا کہ افغانستان کے مستقبل کا فیصلہ صرف افغان عوام کو کرنا چاہیے۔ چینی وزارتِ خارجہ کے ڈپٹی ڈائریکٹر نے واضح کیا کہ چین خطے میں کشیدگی یا تناؤ کی حمایت نہیں کرتا اور امید رکھتا ہے کہ تمام فریق امن و استحکام کے لیے تعمیری کردار ادا کریں گے۔
