لندن: وزیر اعظم شہباز شریف نے کہا ہے کہ پاکستان اور بھارت کے درمیان چار جنگیں ہوئیں، اربوں ڈالر خرچ ہوئے، حالانکہ جنگوں پر خرچ ہونے والے یہ وسائل عوام کی ترقی اور خوشحالی پر صرف ہونے چاہئیں تھے۔
اوورسیز پاکستانیز فاؤنڈیشن کی تقریب سے خطاب کرتے ہوئے وزیراعظم نے کہا کہ پاکستان اور بھارت ہمسایہ ممالک ہیں اور ہمیں ساتھ رہنا ہے، لیکن بھارت سے تعلقات برابری کی بنیاد پر ہی قائم ہوسکتے ہیں۔ انہوں نے واضح کیا کہ مسئلہ کشمیر کے حل کے بغیر پاک بھارت تعلقات آگے نہیں بڑھ سکتے۔
وزیراعظم نے کہا کہ کشمیری عوام کی قربانیاں رائیگاں نہیں جانے دی جائیں گی۔
اس موقع پر وزیراعظم نے اوورسیز پاکستانیوں کو خراجِ تحسین پیش کرتے ہوئے انہیں ملکی ترقی میں ریڑھ کی ہڈی قرار دیا اور اپنے خطاب میں اشعار بھی سنائے۔
وزیراعظم کے چار روزہ لندن قیام کے دوران پاکستانی کمیونٹی اور تاجر برادری کے رہنماؤں سے ملاقاتیں بھی ہوئیں۔
وفاقی وزیر اطلاعات عطا تارڑ کے مطابق وزیراعظم کا لندن میں خطاب آج دوپہر نشر کیا جائے گا۔ انہوں نے کہا کہ وزیر اعظم نے آپریشن بنیان مرصوص، معیشت اور سفارتی تعلقات پر پرجوش خطاب کیا، جس میں لوگوں کی بڑی تعداد نے شرکت کی۔
واضح رہے کہ وزیراعظم شہباز شریف اقوام متحدہ کی جنرل اسمبلی کے اجلاس میں شرکت کے لیے آج لندن سے امریکہ روانہ ہوں گے۔ اپنے دورۂ امریکہ کے دوران وہ جنرل اسمبلی سے خطاب کریں گے اور غزہ پر خصوصی اجلاس میں بھی شریک ہوں گے۔
وزیراعظم شہباز شریف اپنے دورے میں مسئلہ کشمیر، فلسطین اور قطر پر حملے سے متعلق پاکستان کا مؤقف عالمی برادری کے سامنے پیش کریں گے۔
