وزیرِاعظم پاکستان محمد شہباز شریف کے حالیہ دورۂ سعودی عرب کے دوران ایک قابلِ فخر لمحہ اس وقت دیکھنے میں آیا جب ان کا سرکاری ہوائی جہاز سعودی فضائی حدود میں داخل ہوا۔ جیسے ہی وزیرِاعظم کا طیارہ سعودی حدود میں داخل ہوا، سعودی فضائیہ کے جدید F-15 لڑاکا طیارے معزز مہمان کے طیارے کے ساتھ پرواز کرنے لگے۔ یہ ایک اعلیٰ سطح کی فضائی سلامی تھی، جو سعودی عرب کی جانب سے پاکستان کے ساتھ برادرانہ تعلقات اور وزیرِاعظم کی آمد کی اہمیت کو ظاہر کرتی ہے۔
وزیرِاعظم شہباز شریف ایک اعلیٰ سطحی وفد کے ہمراہ سعودی عرب کے خصوصی دورے پر روانہ ہوئے، جہاں وہ سعودی ولی عہد شہزادہ محمد بن سلمان اور دیگر اہم حکومتی شخصیات سے ملاقاتیں کریں گے۔ اس دورے کا مقصد دو طرفہ تعلقات کو مزید مضبوط بنانا، اقتصادی تعاون کو فروغ دینا اور خلیجی سرمایہ کاری کے نئے مواقع تلاش کرنا ہے۔
ذرائع کے مطابق، اس دورے میں توانائی، تعمیرات، زراعت، اور آئی ٹی کے شعبوں میں اہم معاہدے متوقع ہیں۔ وزیرِاعظم عمرہ کی سعادت بھی حاصل کریں گے اور مدینہ منورہ میں روضۂ رسول ﷺ پر حاضری بھی دیں گے۔
وزیراعظم شہباز شریف سرکاری دورے پر ریاض روانہ
سعودی فضائیہ کی جانب سے F-15 لڑاکا طیاروں کے ذریعے دی جانے والی یہ استقبالی سلامی نہ صرف ایک عسکری روایت ہے بلکہ دونوں ممالک کے درمیان گہرے اسٹریٹیجک، مذہبی، اور تاریخی تعلقات کی علامت بھی ہے۔ وزیرِاعظم کے اس دورے کو پاکستان اور سعودی عرب کے درمیان اعتماد، تعاون اور بھائی چارے کے ایک اور مضبوط باب کے طور پر دیکھا جا رہا ہے۔
