لاہور: ڈی جی پی ڈی ایم اے پنجاب عرفان علی کاٹھیا نے کہا ہے کہ سیلابی پانی تیزی سے نیچے کی طرف جا رہا ہے اور 24 سے 48 گھنٹوں کے اندر دریا میں پانی کا بہاؤ معمول پر آ جانے کی توقع ہے۔
انہوں نے بتایا کہ ستمبر کے آخر میں غیر متوقع بارشوں کا سلسلہ جاری ہے اور اس دوران شجاع آباد اور جلال پور پیروالا کے مقام پر بندوں میں شگاف پڑنے کی وجہ سے موٹروے بند کر کے مرمتی کام جاری ہے۔ گوجرانوالہ اور گجرات میں نکاسی کا نظام بہتر ہوا ہے جبکہ مظفر گڑھ کی تحصیل علی پور میں 17 ہزار خاندانوں کے لیے ٹینٹ سٹی قائم کی گئی ہے۔
عرفان کاٹھیا نے مزید کہا کہ پنجاب بھر میں سیلاب متاثرین کے لیے راشن اور مویشیوں کے لیے چارے کا انتظام کیا جا رہا ہے۔ حکومت پنجاب پوری طرح متحرک ہے اور وزیراعلیٰ پنجاب اور ان کی ٹیم فیلڈ میں موجود ہیں۔ سیلاب زدہ علاقوں میں نقصانات کا تخمینہ لگانے کے لیے ٹیم بھی تشکیل دی گئی ہے، جس کے بعد 30 دنوں میں متاثرین کے نقصانات کا ازالہ کیا جائے گا۔
پنجاب میں مزید بڑی بارشوں کا کوئی امکان نہیں: ڈی جی پی ڈی ایم اے
انہوں نے بتایا کہ ریلیف کیمپس میں متاثرین کو میڈیکل سہولیات فراہم کی جا رہی ہیں جہاں جلدی امراض کی شکایات زیادہ ہیں اور روزانہ ہزاروں مریضوں کو علاج دیا جا رہا ہے۔ ڈی جی پی ڈی ایم اے کا کہنا تھا کہ سیلابی پانی کی سطح تیزی سے کم ہو رہی ہے اور جلد ہی صورتحال بہتر ہو جائے گی۔
