پاکستان میں ایک خوشخبری آ گئی ہے کہ وفاقی حکومت نے اسلام آباد اور راولپنڈی کے درمیان جدید اور تیز رفتار ٹرین سروس شروع کرنے کا فیصلہ کر لیا ہے۔ اس نئی ٹرین سروس کے ذریعے جڑواں شہروں کے درمیان سفر صرف 20 منٹ میں مکمل ہو سکے گا، جو مسافروں کے لیے وقت کی بچت اور آسانی کا باعث بنے گا۔
وزیر داخلہ محسن نقوی اور چیئرمین سی ڈی اے حنیف عباسی کی زیر صدارت منعقدہ اجلاس میں اس منصوبے پر تفصیلی بات چیت ہوئی، جس میں طلال چودھری سمیت دیگر اعلیٰ حکام نے بھی شرکت کی۔ اجلاس میں مارگلہ سے راولپنڈی صدر تک ریل منصوبے کو جلد مکمل کرنے پر اتفاق کیا گیا اور فیصلہ کیا گیا کہ ٹریک وزارت ریلوے فراہم کرے گی جبکہ ٹرین سروس کا انتظام سی ڈی اے سنبھالے گی۔
اجلاس میں یہ بھی فیصلہ کیا گیا کہ آئندہ ہفتے منصوبے کے فریم ورک معاہدے کو حتمی شکل دے کر دستخط کیے جائیں گے۔ اس کے علاوہ، منصوبے کے لیے جدید اور تیز رفتار ٹرین درآمد کرنے پر بھی اتفاق کیا گیا ہے تاکہ شہریوں کو معیاری اور آرام دہ سفر کی سہولت میسر ہو۔
ای ٹیکسی اسکیم: آسان اقساط پر گاڑی کے مالک بننے کا سنہری موقع
چیئرمین سی ڈی اے حنیف عباسی نے کہا کہ یہ منصوبہ شہریوں کو تیز، آسان اور معیاری سفری سہولت فراہم کرے گا۔ وزیر داخلہ محسن نقوی نے وزیراعظم شہباز شریف کے ویژن کو سراہتے ہوئے کہا کہ یہ منصوبہ عوام کو سہولت دینے کے لیے شروع کیا جا رہا ہے اور اس سے ہزاروں شہری مستفید ہوں گے۔ طلال چودھری نے اس موقع پر کہا کہ نئی ٹرین سروس نہ صرف کم خرچ اور تیز رفتار سفری سہولت فراہم کرے گی بلکہ سڑکوں پر ٹریفک کے دباؤ کو بھی کم کرے گی۔
یہ منصوبہ اسلام آباد اور راولپنڈی کے شہریوں کے لیے ایک اہم پیش رفت ثابت ہوگا اور پاکستان میں ٹرانسپورٹ کے نظام کو جدید خطوط پر استوار کرنے کی جانب ایک بڑا قدم ہے۔
