واسا گجرات کیلئے ایک ارب روپے کی ابتدائی گرانٹ جاری

گجرات: حکومتِ پنجاب نے واسا گجرات کے لیے ابتدائی طور پر ایک ارب روپے کی گرانٹ جاری کر دی ہے۔ یہ رقم ادارے کے بنیادی ڈھانچے کی تشکیل کے لیے استعمال کی جائے گی۔

سرکاری ذرائع کے مطابق، اس گرانٹ کے ذریعے واسا گجرات کے دفاتر تعمیر کیے جائیں گے اور جدید مشینری خریدی جائے گی تاکہ شہر میں نکاسی آب، صفائی، اور سیوریج کے مسائل کا مؤثر حل نکالا جا سکے۔

یہ قدم حالیہ بارشوں کے دوران شہر میں پیدا ہونے والی سنگین نکاسی آب کی صورتحال کے بعد اٹھایا گیا ہے، جہاں شہری حلقوں کی جانب سے واسا کے قیام اور فعال کردار کی شدید ضرورت محسوس کی جا رہی تھی۔

ذرائع کا کہنا ہے کہ حکومت مزید فنڈز بھی مرحلہ وار جاری کرے گی تاکہ واسا گجرات ایک مکمل ادارے کے طور پر جلد اپنی خدمات شروع کر سکے۔