پاکستان بحرین کے ساتھ مضبوط سفارتی اور دفاعی تعلقات کو قدر کی نگاہ سے دیکھتا ہے، سربراہ پاک فضائیہ

راولپنڈی میں پاکستان فضائیہ کے سربراہ ظہیر احمد بابر سدھو نے بحرین کی ڈیفنس فورس کے چیف آف سٹاف، لیفٹیننٹ جنرل تھیاب صقر عبداللہ النعیمی سے ایئر ہیڈ کوارٹرز اسلام آباد میں ملاقات کی۔ اس موقع پر پاک فضائیہ نے لیفٹیننٹ جنرل النعیمی کو گارڈ آف آنر بھی پیش کیا۔

ملاقات کے دوران دونوں عسکری افسران نے باہمی دلچسپی کے مختلف امور پر تبادلہ خیال کیا اور مشترکہ تعاون کو مزید فروغ دینے کے لیے نئی راہیں استوار کرنے کا عزم ظاہر کیا۔ دونوں رہنماؤں نے باہمی شراکت داری کے ذریعے دونوں ممالک کی افواج کے مابین مشترکہ تربیت اور ترقی کے پروگرامز پر اتفاق کیا۔

پاک فضائیہ کے سربراہ نے کہا کہ پاکستان بحرین کے ساتھ اپنے مضبوط سفارتی اور دفاعی تعلقات کو بہت قدر کی نگاہ سے دیکھتا ہے اور ان تعلقات کو مزید مضبوط بنانے کا خواہاں ہے۔