پنجاب کے مختلف سیلاب متاثرہ علاقوں میں پہلی بار جدید تھرمل ٹیکنالوجی کا کامیاب استعمال کرتے ہوئے ریسکیو ٹیموں نے 490 سے زائد افراد کو بچا کر محفوظ مقامات پر منتقل کردیا۔
ریسکیو حکام کے مطابق اوکاڑہ، جھنگ، اٹھاراں ہزاری، شورکوٹ اور احمد پور سیال میں رات کی تاریکی میں تھرمل ٹیکنالوجی کی مدد سے متاثرین کا پتہ لگا کر آپریشنز ممکن ہوئے۔ اس ٹیکنالوجی نے وہ افراد بھی ظاہر کردیے جو عام انسانی آنکھ سے نظر نہیں آ رہے تھے۔
تفصیلات کے مطابق جھنگ سٹی بند سے 21، پنڈی محلہ سے 1، کھلڑا سے 12، ددوآنڑاں سے 63، علی پور سے 70، ٹھٹھہ جبانڑاں سے 85، مساں سے 4 اور واجد آباد شاہ جیونہ سے 10 افراد کو کامیابی سے بچایا گیا۔ اسی طرح وجھلنڑاں سے 20، چک نون سے 4، جوگیرا بوچھیراں سے 80، کھروڑا بکر سے 30، شورکوٹ کے علاقے ڈب کلاں سے 20، احمد پور سیال کے دربار عبدالرزاق سے 4 اور ولی محمد جھندیر سے 45 افراد کو بھی ریسکیو کر لیا گیا۔
وزیراعلیٰ پنجاب مریم نواز شریف نے تھرمل ٹیکنالوجی کے کامیاب استعمال پر ریسکیو ٹیم کو شاندار الفاظ میں خراجِ تحسین پیش کیا۔ ان کا کہنا تھا کہ یہ ٹیکنالوجی رات کے اندھیرے میں بھی انسانی جانوں کو بچانے میں سنگِ میل ثابت ہوئی ہے اور پنجاب کی تاریخ میں پہلی بار ریسکیو آپریشنز میں اس کا عملی استعمال کیا گیا ہے۔
ماہرین کے مطابق تھرمل ٹیکنالوجی ایک انقلابی پیشرفت ہے جو مستقبل میں قدرتی آفات کے دوران ریسکیو آپریشنز کو مزید تیز اور مؤثر بنانے میں مددگار ثابت ہوگی۔
