لاہور، ہیئر کے علاقے میں گھریلو جھگڑے کے نتیجے میں افسوسناک واقعہ پیش آیا جہاں ملزم عمران نے بیوی، بیٹی، بھتیجے اور سسر کو چھریوں کے وار کرکے قتل کر دیا اور موقع سے فرار ہوگیا۔
مقتولین میں 35 سالہ فوزیہ، 14 سالہ زینب، 15 سالہ رضا اور 55 سالہ مرزا شامل ہیں۔
واقعہ کی اطلاع ملتے ہی پولیس کی بھاری نفری اور امدادی ٹیمیں جائے وقوعہ پر پہنچ گئیں اور چاروں لاشوں کو ضروری کارروائی کے بعد اسپتال منتقل کر دیا گیا۔ ایس پی کینٹ قاضی علی رضا کے مطابق پولیس اور فرانزک ٹیم نے جائے وقوعہ سے اہم شواہد اکٹھے کر لیے ہیں جبکہ مقتولہ کے بھائی ندیم کی مدعیت میں ملزم عمران کے خلاف مقدمہ درج کر لیا گیا ہے۔
ایس پی کینٹ نے مزید کہا کہ ملزم کی گرفتاری کے لیے خصوصی ٹیم تشکیل دے دی گئی ہے اور چھاپے مارے جا رہے ہیں۔ ان کا کہنا تھا کہ قانون ہاتھ میں لینے والوں کو کسی صورت رعایت نہیں دی جائے گی، ملزم کو جلد گرفتار کرکے عدالت کے سامنے پیش کیا جائے گا اور قرار واقعی سزا دلائی جائے گی۔
یاد رہے کہ لاہور میں گھریلو جھگڑوں کے نتیجے میں پیش آنے والے واقعات میں حالیہ عرصے کے دوران اضافہ دیکھنے میں آیا ہے جس پر شہریوں نے بھی تشویش کا اظہار کیا ہے۔
