وزیر مملکت داخلہ نے کہا کہ پی ٹی آئی ٹارگٹ نہیں، قانون توڑنے والوں کے خلاف کارروائی جاری ہے، اور گرینڈ ڈائیلاگ کے لیے اسپیکر کی پیشکش موجود ہے۔
وزیر مملکت داخلہ طلال چوہدری نے واضح کیا ہے کہ پاکستان تحریک انصاف (پی ٹی آئی) کو ہدف نہیں بنایا جا رہا بلکہ ٹارگٹ وہ لوگ ہیں جنہوں نے قانون توڑا ہے۔
پروگرام جیو پاکستان میں گفتگو کرتے ہوئے انہوں نے کہا کہ پی ٹی آئی کو بھی تاکید کی گئی ہے کہ وہ ایسے افراد سے لاتعلقی اختیار کرے جو قانون کی خلاف ورزی کرتے ہیں، طلال چوہدری نے مزید کہا کہ پولیس نے شواہد جمع کر کے گرفتاریاں عمل میں لائی ہیں، اور علیمہ خان کے بیٹے کا حسان نیازی کے ساتھ موجود ہونا اس ضمن میں نوٹ کیا گیا ہے۔
وزیر مملکت نے اسپیکر قومی اسمبلی کی جانب سے جاری کیے گئے گرینڈ ڈائیلاگ کی دعوت کا ذکر کرتے ہوئے کہا کہ اسپیکر نے قومی اسمبلی اور سینیٹ میں بات چیت کے لیے اپنا آفس بھی کھلا رکھا ہے۔
انہوں نے پی ٹی آئی پر زور دیا کہ اگر وہ ڈائیلاگ میں حصہ لینا چاہتی ہے تو اسپیکر کی پیشکش قبول کرے۔ طلال چوہدری نے یہ بھی کہا کہ ضمنی انتخابات میں عوام کے فیصلہ کو تسلیم کیا جائے گا۔
یاد رہے کہ حالیہ سیاسی کشیدگی کے دوران گرفتاریاں اور گرینڈ ڈائیلاگ کی پیشکش کو دونوں فریقین کے درمیان تعلقات کی بحالی کے لیے اہم قدم سمجھا جا رہا ہے۔
