جہلم میں پروفیسر ابراہیم اغواء کیس میں پولیس نے 4 ملزمان گرفتار کر لیے، ماسٹر مائنڈ سابق شاگرد نکلا، تاوان کی رقم کی برآمدگی کے لیے کارروائیاں جاری۔
جہلم میں سرکاری کالج کے پروفیسر ابراہیم کے اغواء کیس میں پولیس نے بڑی کارروائی کرتے ہوئے چار ملزمان کو گرفتار کر لیا۔ پولیس کے مطابق تین ملزمان کو جہلم جبکہ ایک کو روات سے حراست میں لیا گیا۔
تحقیقات کے دوران یہ انکشاف ہوا کہ اغواء کا ماسٹر مائنڈ سید سبط شاہ ہے جو پروفیسر ابراہیم کا سابق شاگرد رہ چکا ہے جبکہ ایک اور مرکزی ملزم شاہ زیب اغواء سے قبل پروفیسر کی اکیڈمی میں ملازم تھا۔ پولیس کا کہنا ہے کہ دونوں ملزمان طویل عرصے سے اس واردات کی منصوبہ بندی کر رہے تھے۔
پولیس ذرائع کے مطابق اس کیس میں کل آٹھ ملزمان شامل تھے، جن میں سے چار کو گرفتار کر لیا گیا ہے جبکہ دیگر کی گرفتاری کے لیے چھاپے مارے جا رہے ہیں، پولیس حکام پرامید ہیں کہ تمام ملزمان گرفتار ہونے کے بعد تاوان کی رقم بھی برآمد کر لی جائے گی۔
یاد رہے کہ12 اگست کو پروفیسر ابراہیم کو ریویژن اکیڈمی کے باہر سے اغواء کیا گیا تھا، اور اگلے روز یعنی 13 اگست کو ملزمان نے 40 لاکھ روپے تاوان وصول کرنے کے بعد انہیں رہا کر دیا تھا۔ پولیس نے مزید ملزمان کی گرفتاری اور تاوان کی رقم کی برآمدگی کے لیے تفتیشی عمل مزید تیز کر دیا ہے۔
