16
کسان اتحاد کے صدر خالد کھوکھر کا کہنا ہے کہ کپاس کی پیداوار ایک کروڑ 28 لاکھ گانٹھوں سے کم ہو کر 52 لاکھ رہ گئی، آم کی ایکسپورٹ میں بھی 40 فیصد کمی۔
ملتان،پاکستان کسان اتحاد کے مرکزی صدر خالد کھوکھر نے دعویٰ کیا ہے کہ سازش کے تحت ملک سے کپاس کی فصل ختم کی جا رہی ہے۔
میڈیا سے گفتگو میں خالد کھوکھر کا کہنا تھا کہ پاکستان میں کپاس کی پیداوار ایک کروڑ 28 لاکھ گانٹھوں سے گھٹ کر صرف 52 لاکھ گانٹھوں تک آگئی ہے، جو ملکی معیشت اور ٹیکسٹائل انڈسٹری کے لیے خطرناک ہے۔
ان کا مزید کہنا تھا کہ اس سیزن میں کھاد کا استعمال بھی نمایاں طور پر کم ہوا جس سے کپاس کی پیداوار میں مزید کمی دیکھنے میں آئی۔
کسان اتحاد کے صدر نے یہ بھی انکشاف کیا کہ آم کی فصل کی برآمدات میں بھی 40 فیصد کمی ریکارڈ کی گئی ہے، جس سے کسان براہِ راست متاثر ہو رہے ہیں۔
