لاہور، معروف یوٹیوبر رجب بٹ نے اپنے ساتھی اور سابق دوست سعد الرحمان المعروف ڈکی بھائی کی گرفتاری پر ردعمل دیتے ہوئے کہا ہے کہ قانون سب کے لیے برابر ہونا چاہیے۔
واضح رہے کہ ڈکی بھائی ان دنوں بیٹنگ ایپ کیس میں قانونی کارروائی کا سامنا کر رہے ہیں۔ انہیں قانون نافذ کرنے والے اداروں نے حراست میں لیا اور عدالت نے جسمانی ریمانڈ پر پولیس کے حوالے کر رکھا ہے۔ ان کے خلاف تحقیقات جاری ہیں۔
رجب بٹ نے ڈکی بھائی کے خلاف کارروائی پر اپنے خیالات کا اظہار کرتے ہوئے کہا کہ "ہم سب نے دیکھا ہے کہ پاکستان سپر لیگ کے دوران کھلاڑیوں کی جرسیوں پر انہی بیٹنگ ایپس کے لوگو موجود تھے اور قومی ٹی وی پر ان کے اشتہارات بھی دکھائے گئے۔” ان کا کہنا تھا کہ اگر یہ سب کچھ سرعام ہو رہا ہے تو پھر صرف چند افراد کو ہی نشانہ کیوں بنایا جا رہا ہے؟
رجب نے مزید کہا کہ ممکن ہے کہ سینکڑوں انفلوئنسرز نے ان ایپس کی تائید کی ہو، لیکن ایجنسیاں صرف ان لوگوں کے پیچھے جا رہی ہیں جنہیں گرفتار کرنا نسبتاً آسان ہے۔ انہوں نے سوال اٹھایا کہ آخر بڑی مچھلیوں کے خلاف کارروائی کیوں نہیں کی جاتی؟
انہوں نے ڈکی بھائی اور ان کے خاندان کے لیے ہمدردی کا اظہار کرتے ہوئے کہا کہ وہ مشکل وقت سے گزر رہے ہیں اور دوستوں سے دوری نے ان کے مسائل مزید بڑھا دیے ہیں۔
رجب بٹ کے اس بیان کے بعد سوشل میڈیا پر ایک نئی بحث شروع ہو گئی ہے، جہاں صارفین قانون کے اطلاق میں یکسانیت پر سوال اٹھا رہے ہیں اور یہ مطالبہ کیا جا رہا ہے کہ صرف چند افراد کو ہدف بنانے کے بجائے اصل ذمہ داروں کے خلاف بھی سخت کارروائی کی جائے۔
