برطانیہ نے پاکستان میں حالیہ مون سون بارشوں اور سیلاب سے متاثرہ افراد کے لیے 1.33 ملین پاؤنڈ (تقریباً 60 کروڑ روپے) کی انسانی ہمدردی کی امداد دینے کا اعلان کیا ہے۔
پنجاب، خیبرپختونخوا اور گلگت بلتستان کے سات اضلاع میں 2 لاکھ 23 ہزار سے زائد متاثرین کی فوری مدد کے لیے استعمال کی جائے گی۔
برطانوی ہائی کمشنر جین میریٹ کے مطابق یہ امداد متاثرہ علاقوں میں خشک راشن، پینے کے پانی کے نظام کی بحالی، نہری نظام کی مرمت، موبائل میڈیکل کیمپس کے قیام اور کھیتی باڑی کی بحالی جیسے اہم شعبوں میں استعمال کی جا رہی ہے۔ اس کے ساتھ ساتھ متاثرہ کمیونٹیز کیلئے سرچ اینڈ ریسکیو آپریشنز کو بھی تقویت دی گئی ہے۔
سپہ سالار امدادی کارروائیوں کی قیادت کر رہے ہیں: وزیراعظم شہباز شریف
اب تک 2,400 سے زائد مقامی رضاکاروں کو سرچ اینڈ ریسکیو کی تربیت دی جا چکی ہے، جن میں سے 25 رضاکار چارسدہ سے بونیر پہنچ کر ریسکیو 1122 کے ساتھ امدادی کارروائیوں میں شریک ہو چکے ہیں۔ متاثرہ علاقوں میں بنیادی طبی سہولتوں کی فراہمی کے لیے موبائل میڈیکل یونٹس بھی سرگرم ہیں۔
متاثرہ خاندانوں کو خیمے، راشن، گھریلو سامان اور خواتین کے لیے ضروری اشیاء پر مشتمل ڈگنٹی کٹس بھی فراہم کی جا رہی ہیں۔ اقوام متحدہ کا انسانی ہمدردی کا ادارہ (UNOCHA) مختلف امدادی تنظیموں کے ساتھ مل کر اس امداد کو تیزی اور مؤثر انداز میں تقسیم کر رہا ہے۔
