اسلام آباد، بانی چیئرمین پاکستان تحریک انصاف عمران خان کے خلاف 9 مئی کے مقدمات میں ضمانت کی اپیلوں پر سماعت کرنے والے سپریم کورٹ کے بینچ میں تبدیلی کر دی گئی۔
تفصیلات کے مطابق چیف جسٹس پاکستان یحییٰ آفریدی کی سربراہی میں سماعت کرنے والے تین رکنی بینچ میں جسٹس میاں گل حسن اورنگزیب کی جگہ جسٹس حسن اظہر رضوی کو شامل کر لیا گیا ہے۔
عدالت میں اس وقت استغاثہ کے وکیل ذوالفقار نقوی کے دلائل جاری ہیں۔ گزشتہ روز اسپیشل پراسیکیوٹر ذوالفقار نقوی کی طبیعت اچانک خراب ہونے کے باعث سماعت ملتوی کر دی گئی تھی، تاہم عدالت نے آج دوبارہ مقدمہ سننے کا حکم دیا تھا۔
ذرائع کے مطابق عدالت اب عمران خان کی ضمانت سے متعلق اپیلوں پر فریقین کے دلائل مکمل ہونے کے بعد فیصلہ محفوظ کرے گی، اس تبدیلی کے بعد سیاسی و قانونی حلقوں میں بحث چھڑ گئی ہے کیونکہ 9 مئی کے واقعات کے مقدمات کو ملکی سیاست میں انتہائی اہمیت حاصل ہے اور ان کے فیصلے آئندہ منظرنامے پر گہرا اثر ڈال سکتے ہیں۔
