پنجاب اسمبلی کے اسپیکر ملک محمد احمد خان کی براہ راست مداخلت اور احکامات کے بعد گرفتار اپوزیشن کے 9 اراکین اسمبلی کو رہا کر دیا گیا۔
پنجاب اسمبلی کا اجلاس شروع ہوتے ہی اپوزیشن ارکان نعرے بازی کرتے ہوئے ایوان میں داخل ہوئے اور اسپیکر کے ڈائس کا گھیراؤ کیا، تاہم یہ احتجاج صرف علامتی ثابت ہوا، جس کے بعد اراکین اپنی نشستوں پر جا کر بیٹھ گئے۔
اسمبلی اجلاس کے دوران اسپیکر نے اعلان کیا کہ گرفتار اراکین کے خلاف ایف آئی آر رکوا دی گئی ہے اور میاں مجتبیٰ شجاع الرحمان کو ہدایت دی گئی کہ وہ گرفتار ارکان کو رہا کروا کر اسمبلی میں لائیں۔ اسپیکر کی اس ہدایت پر پولیس نے فوری طور پر کارروائی کرتے ہوئے اپوزیشن کے تمام 9 گرفتار اراکین کو رہا کر دیا۔
رہائی کے بعد ڈپٹی اپوزیشن لیڈر معین ریاض قریشی نے میڈیا سے گفتگو کرتے ہوئے کہا کہ اس قسم کی گرفتاریاں ہمارے حوصلے پست کرنے کے بجائے مزید مضبوط کرتی ہیں۔ انہوں نے کہا کہ ہم پاکستان تحریک انصاف کے چیئرمین عمران خان اور ان کے نظریے کے ساتھ سیسہ پلائی دیوار کی طرح کھڑے ہیں۔
یاد رہے کہ حالیہ دنوں میں پنجاب اسمبلی کے ماحول میں سخت کشیدگی دیکھی جا رہی ہے جہاں اپوزیشن کی جانب سے مسلسل احتجاج اور حکومت کے ساتھ تناؤ کی کیفیت برقرار ہے۔ اس رہائی کو ایوان میں وقتی سکون کا سبب تو کہا جا سکتا ہے، تاہم سیاسی محاذ آرائی اب بھی شدت سے جاری ہے۔
