انگلینڈ کے نوجوان فاسٹ بولر گَس ایٹکنسن نے بھارت کے خلاف جاری پانچویں ٹیسٹ میچ میں شاندار کارکردگی کا مظاہرہ کرتے ہوئے ٹیسٹ کرکٹ کی تاریخ میں 129 سال پرانا ریکارڈ برابر کر دیا۔
چوٹ کی وجہ سے ابتدائی چار میچز سے باہر رہنے والے ایٹکنسن نے فیصلہ کن میچ میں زبردست واپسی کی۔ انہوں نے بھارت کی پہلی اننگز میں صرف چند اوورز میں تباہ کن بولنگ کرتے ہوئے 5 اہم کھلاڑیوں کو پویلین لوٹا دیا۔ ان کی شکار بننے والوں میں یشسوی جیسوال، دھروو جورَیل، واشنگٹن سندر، محمد سراج اور پرسدھ کرشنا شامل ہیں۔
اس شاندار کارکردگی کے بعد ایٹکنسن نے اپنے ٹیسٹ کیریئر کی 60 وکٹیں مکمل کر لیں، جو انہوں نے صرف 13 میچوں میں حاصل کیں۔ ان کا اسٹرائیک ریٹ 34.9 رہا، جو کہ 1896 کے بعد اب تک کا سب سے بہتر اسٹرائیک ریٹ ہے کسی ایسے بولر کا جس نے اتنی ہی وکٹیں لی ہوں۔
یہ اعزاز اس سے پہلے صرف انگلینڈ کے لیجنڈری فاسٹ بولر جارج لوہمن کے پاس تھا، جنہوں نے 34.1 کے اسٹرائیک ریٹ کے ساتھ 60 وکٹیں حاصل کی تھیں۔ اس فہرست میں آسٹریلیا کے اسکاٹ بولینڈ تیسرے نمبر پر ہیں جن کا اسٹرائیک ریٹ 36 رہا۔
میچ کی صورتحال:
اوول، لندن میں جاری سیریز کے آخری اور پانچویں ٹیسٹ میں انگلینڈ نے ٹاس جیت کر بھارت کو پہلے بیٹنگ کی دعوت دی۔ بھارتی ٹیم پہلی اننگز میں 224 رنز پر ڈھیر ہو گئی۔
جواب میں انگلش ٹیم اپنی پہلی اننگز میں 247 رنز بنا سکی، جس کے ساتھ اسے 23 رنز کی برتری حاصل ہو گئی۔
دوسرے دن کے اختتام پر بھارت نے اپنی دوسری اننگز میں 2 وکٹوں کے نقصان پر 75 رنز بنا لیے ہیں۔ یشسوی جیسوال 51 رنز پر ناٹ آؤٹ ہیں جبکہ نائٹ واچ مین آکاش دیپ 4 رنز پر وکٹ پر موجود ہیں۔ بھارت کو فی الحال 52 رنز کی مجموعی برتری حاصل ہے۔
