کراچی میں گوجرانوالہ سے تعلق رکھنے والے مقتول جوڑے کے قتل کیس میں اہم پیش رفت سامنے آئی ہے، مقتولہ ثناء کا سگا بھائی وقاص ہی اپنی بہن اور بہنوئی کے قتل میں ملوث نکلا۔
پولیس حکام کے مطابق وقاص نے اعترافِ جرم کر لیا ہے، جبکہ اس کے رشتہ دار عاصم اور اس کا دوست عمران بھی اس بہیمانہ قتل میں شریک تھے، ابتدائی تفتیش کے مطابق ملزم عاصم اور عمران 19 جولائی کو لاہور سے کراچی پہنچے اور 25 جولائی کو واپس چلے گئے۔
وقاص نے انکشاف کیا کہ عاصم کا منصوبہ تھا کہ شوٹرز کے ذریعے جوڑے کو قتل کیا جائے۔
ملزموں نے مقتول ساجد اور ثناء کا کراچی میں پیچھا کیا، پولیس کو شبہ ہے کہ ساجد کا دوست احتشام، جو ان کے ساتھ کراچی گیا تھا، اس جرم میں نادانستہ طور پر مددگار ثابت ہوا۔ احتشام، عاصم کا بھی دوست ہے اور دونوں کے درمیان کراچی میں ٹیلی فونک رابطہ بھی ہوا تھا۔
پولیس کے مطابق قتل کے بعد سے احتشام لاپتہ ہے اور اس نے کسی سے کوئی رابطہ نہیں کیا، جبکہ ملزمان عاصم اور عمران کی تلاش جاری ہے۔
واضح رہے کہ گزشتہ روز کراچی کے علاقے کلفٹن میں چائنا پورٹ کے قریب جھاڑیوں سے ایک مرد اور خاتون کی لاشیں ملی تھیں، جنہیں انتہائی بے دردی سے سروں پر گولیاں مار کر قتل کیا گیا تھا۔ مقتولین کی شناخت ثناء اور ساجد کے نام سے ہوئی تھی، جو حال ہی میں کورٹ میرج کے بعد کراچی منتقل ہوئے تھے۔
