واشنگٹن ڈی سی: دنیا کی سب سے بڑی معیشت کہلانے والی امریکہ کی حکومت نے قومی قرضہ کم کرنے کے لیے ایک غیر معمولی اقدام کرتے ہوئے عوام سے براہ راست مالی مدد کی اپیل کر دی ہے۔ امریکی محکمہ خزانہ نے سرکاری ویب سائٹ Pay.gov پر "Gifts to Reduce the Public Debt” کے نام سے ایک خصوصی سیکشن بنایا ہے، جہاں شہری PayPal، Venmo، کریڈٹ یا ڈیبٹ کارڈ، اور بینک ٹرانسفر کے ذریعے قومی خزانے کو عطیات دے سکتے ہیں۔
امریکی وزارت خزانہ کے مطابق ملک کا قومی قرضہ 36.7 کھرب ڈالرز سے تجاوز کر چکا ہے، جو ہر سیکنڈ تقریباً 55 ہزار ڈالر کے حساب سے بڑھ رہا ہے۔ اگرچہ یہ پروگرام 1996 سے موجود ہے، تاہم اب اسے ڈیجیٹل پلیٹ فارمز کے ذریعے مزید مؤثر بنانے کی کوشش کی جا رہی ہے۔
عطیات کا حالیہ ڈیٹا
- 2024 میں امریکی عوام نے مجموعی طور پر 27 لاکھ ڈالرز قومی قرض اتارنے کے لیے دیے۔
- 2025 کے ابتدائی 5 مہینوں میں صرف 4 لاکھ 34 ہزار ڈالرز جمع ہو سکے ہیں۔
- پروگرام کی مجموعی تاریخ میں اب تک محض 67.3 ملین ڈالرز جمع ہوئے ہیں، جو کہ کھربوں ڈالرز کے قرض کے مقابلے میں انتہائی معمولی رقم ہے۔
عوامی ردعمل: مذاق یا مجبوری؟
سوشل میڈیا پر اس اقدام کو شدید تنقید کا نشانہ بنایا جا رہا ہے۔ متعدد صارفین نے اس کو "مزاحیہ”، "شرمناک” اور "حکومتی ناکامی کا عکس” قرار دیا۔ ایک صارف نے لکھا:
"ہماری آمدن کا 40 فیصد پہلے ہی حکومت لے جاتی ہے، اب قرضہ اتارنے کے لیے ہم سے خیرات مانگی جا رہی ہے؟”
ماہرین معاشیات کی تنبیہ
معاشی ماہرین نے بارہا خبردار کیا ہے کہ اگر امریکہ نے اپنے حکومتی اخراجات، سود کی ادائیگیوں، اور مالیاتی پالیسیوں پر قابو نہ پایا تو ملک کو سنگین مالیاتی بحران کا سامنا کرنا پڑ سکتا ہے۔
پس منظر
یاد رہے کہ امریکہ دنیا کا سب سے زیادہ مقروض ملک ہے۔ ماضی کی حکومتیں قومی قرضے کو کم کرنے میں کامیاب نہیں ہو سکیں۔ موجودہ حکومت کا یہ اقدام شاید بڑھتے ہوئے مالیاتی دباؤ اور پالیسی ناکامیوں کا ہی ایک عکس ہے۔
