این ڈی ایم اے نے گلگت بلتستان، مظفرآباد، وادی نیلم میں بارشوں اور ممکنہ سیلاب کی وارننگ جاری کی ہے، متعلقہ اداروں کو الرٹ رہنے کی ہدایت
نیشنل ڈیزاسٹر مینجمنٹ اتھارٹی (این ڈی ایم اے) نے گلگت بلتستان اور آزاد کشمیر کے مختلف علاقوں میں شدید بارشوں کے نتیجے میں ممکنہ سیلاب کی وارننگ جاری کر دی ہے۔ ادارے کے مطابق 28 جولائی سے 31 جولائی کے دوران گلگت، اسکردو، ہنزہ، شگر، مظفرآباد، وادی نیلم اور باغ کے علاقوں میں موسلادھار بارشوں کا امکان ہے، جس سے نشیبی علاقوں میں سیلابی کیفیت پیدا ہو سکتی ہے۔
این ڈی ایم اے کا کہنا ہے کہ آج سے ملک بھر میں مون سون ہواؤں کا داخلہ متوقع ہے، جس کے باعث بارشوں کا سلسلہ شدت اختیار کر سکتا ہے۔ چترال، بونی اور ریشن کے علاقوں میں بارشوں کے ساتھ گلیشیئرز کے پگھلنے سے دریائے چترال کے بہاؤ میں خطرناک حد تک اضافہ ہو سکتا ہے۔ مزید برآں، پہاڑی علاقوں میں لینڈ سلائیڈنگ کا بھی خدشہ ظاہر کیا گیا ہے۔
بابوسر ٹاپ: 15 سیاح لاپتہ، گلگت بلتستان حکومت کی شہریوں کو محتاط رہنے کی ہدایت
ادارے نے مظفرآباد اور باغ کے شہری علاقوں میں ممکنہ سیلابی صورتحال پر بھی خبردار کیا ہے اور تمام متعلقہ اداروں کو ہدایت جاری کی ہے کہ وہ حفاظتی اقدامات کو یقینی بنائیں تاکہ انسانی جان و مال کے نقصان سے بچا جا سکے۔
یاد رہے کہ ہر سال مون سون کے دوران ان علاقوں میں بارشوں اور گلیشیئر پگھلنے سے خطرناک صورتِ حال پیدا ہوتی ہے، جس کے باعث این ڈی ایم اے پیشگی وارننگ اور حفاظتی تدابیر کی تلقین کرتا ہے۔
