وزیراعلیٰ خیبرپختونخوا نے کہا کہ سینیٹ انتخابات شفاف ہوئے، پی ٹی آئی نے 6 نشستیں جیتیں، مراد سعید کو مائنس کرنے والوں کو شکست ہوئی۔
پشاور، وزیراعلیٰ خیبرپختونخوا علی امین گنڈاپور نے کہا ہے کہ مراد سعید کی سینیٹ میں واپسی تحریکِ انصاف کی بڑی کامیابی ہے، ان کو مائنس کرنے کی کوششیں ناکام ہو گئیں۔
پشاور میں میڈیا سے گفتگو کرتے ہوئے علی امین گنڈاپور نے کہا کہ "اگلوں کی ضد تھی کہ مراد سعید مائنس ہے، ہم نے انہیں سینیٹر بنا کر سینیٹ پہنچا دیا، یہ ہماری بڑی جیت ہے”۔
انہوں نے دعویٰ کیا کہ خیبرپختونخوا میں سینیٹ انتخابات شفاف طریقے سے ہوئے اور کسی قسم کی خرید و فروخت نہیں ہوئی۔ صحافی کی جانب سے تین ووٹ ڈالنے سے متعلق سوال پر گنڈاپور نے کہا کہ "ہمارا مقصد پورا ہوا، اور ہم نے خرید و فروخت کا دروازہ بند رکھا”۔
احتجاج سے متعلق سوال پر وزیراعلیٰ نے کہا کہ "تاحال پارٹی نے احتجاج کے مقام، طریقہ اور وقت کا فیصلہ نہیں کیا، جب فیصلہ ہوگا تو عوام کو آگاہ کیا جائے گا”۔
مزید گفتگو کرتے ہوئے علی امین گنڈاپور نے 9 مئی کیس میں پی ٹی آئی رہنماؤں کو سنائی گئی سزاؤں کو آئین و قانون کے خلاف قرار دیا اور کہا کہ "پاکستان میں انصاف کا جنازہ نکالا جا چکا ہے”۔
دوسری جانب خیبرپختونخوا حکومت نے 24 جولائی کو امن و امان کے موضوع پر آل پارٹیز کانفرنس (APC) بلانے کا اعلان کر دیا ہے، جس کے لیے وزیراعلیٰ نے سیاسی اور مذہبی جماعتوں کو دعوت نامے ارسال کر دیے ہیں۔
خیال رہے کہ سینیٹ انتخابات میں خیبرپختونخوا سے پی ٹی آئی نے 6 جبکہ اپوزیشن جماعتوں نے 5 نشستوں پر کامیابی حاصل کی۔ جنرل نشستوں میں پی ٹی آئی کے مراد سعید، فیصل جاوید، مرزا آفریدی اور نورالحق قادری کامیاب ہوئے۔
