وفاقی وزیر داخلہ محسن نقوی کا اعلان، سیکیورٹی خدشات کے باعث بلوچستان کے زمینی راستے بند، زائرین صرف ہوائی سفر کر سکیں گے۔
اسلام آباد، وفاقی وزیر داخلہ محسن نقوی نے اعلان کیا ہے کہ رواں برس اربعین کے موقع پر پاکستان سے زائرین بلوچستان کے زمینی راستے سے ایران یا عراق کا سفر نہیں کر سکیں گے۔ ان کا کہنا تھا کہ عوام کے تحفظ اور قومی سلامتی کے پیش نظر یہ مشکل مگر ضروری فیصلہ کیا گیا ہے۔
سوشل میڈیا پلیٹ فارم ایکس (سابقہ ٹوئٹر) پر جاری بیان میں محسن نقوی نے کہا کہ اربعین 2025 کے دوران زمینی راستوں کے بجائے زائرین کو ہوائی سفر کی اجازت ہوگی۔ انہوں نے مزید بتایا کہ دفترِ خارجہ اور حکومتِ بلوچستان سے مشاورت کے بعد یہ اقدام اٹھایا گیا ہے تاکہ کسی بھی ممکنہ خطرے سے بچا جا سکے۔
محسن نقوی نے کہا کہ وزیرِاعظم پاکستان نے اربعین کے لیے خصوصی فلائٹس کی تعداد بڑھانے کے احکامات جاری کر دیے ہیں، تاکہ زائرین کو ہوائی سفر میں سہولت ملے اور وہ محفوظ طریقے سے زیارات کی ادائیگی کر سکیں۔
یاد رہے کہ پچھلے سال بھی بلوچستان سے ایران جانے والے زائرین کو شدید مشکلات کا سامنا رہا تھا، جن میں راستے کی حالت، سیکیورٹی چیک پوسٹس، اور سہولتوں کی کمی شامل تھی۔ اس سال حکومت نے ان خدشات کو مدنظر رکھتے ہوئے ہوائی سفر کو ترجیح دینے کا فیصلہ کیا ہے۔
