گجرات میں عطائی ڈاکٹروں کے خلاف ضلعی انتظامیہ کی جانب سے ایک مؤثر کارروائی عمل میں لائی گئی، جس کے دوران شہر کے مختلف علاقوں میں چار غیر قانونی کلینکس کو سربمہر کر دیا گیا۔
اس کارروائی کی نگرانی ڈپٹی کمشنر نورالعین کی خصوصی ہدایت پر کی گئی جبکہ چھاپوں کی قیادت اسسٹنٹ کمشنر بلال زبیر نے کی۔ رحمٰن پورہ اور اسٹاف گلہ میں کیے گئے ان اچانک چھاپوں کے دوران رضا کلینک، فیضان ہومیوپیتھک کلینک سمیت دو دیگر مراکز کو غیر قانونی پریکٹس پر بند کر دیا گیا۔
کارروائی کے دوران یہ بات سامنے آئی کہ مذکورہ کلینکس نہ صرف محکمہ صحت سے رجسٹرڈ نہیں تھے بلکہ وہاں تعینات عملہ بھی طبی تربیت سے محروم تھا، جبکہ مریضوں کے علاج میں بنیادی طبی اصولوں کی سنگین خلاف ورزیاں جاری تھیں۔ چھاپوں کے وقت چیف ایگزیکٹو آفیسر ہیلتھ ڈاکٹر عطاء المنعم اور ڈپٹی ڈسٹرکٹ ہیلتھ آفیسر ڈاکٹر عثمان نعیم بھی موقع پر موجود تھے جنہوں نے سہولیات، اسٹاف کی اہلیت اور کلینکس کی قانونی حیثیت کا تفصیلی معائنہ کیا۔
انتظامیہ نے اعلان کیا کہ انسانی جانوں کے تحفظ کے لیے عطائیت کے خلاف زیرو ٹالرنس پالیسی پر عمل کیا جا رہا ہے اور اس ضمن میں کسی بھی قسم کی کوتاہی برداشت نہیں کی جائے گی۔ مستقبل میں بھی ایسے غیر قانونی کلینکس کے خلاف سخت اقدامات جاری رہیں گے تاکہ عوام کو محفوظ اور معیاری طبی سہولیات فراہم کی جا سکیں۔
یاد رہے کہ:
گجرات میں عطائی ڈاکٹروں کے خلاف وقتاً فوقتاً کارروائیاں کی جاتی رہی ہیں، تاہم حالیہ مہینوں میں غیر رجسٹرڈ کلینکس کی تعداد میں اضافہ نوٹ کیا گیا، جس پر ضلعی انتظامیہ نے مؤثر حکمت عملی اپناتے ہوئے سخت اقدامات کا آغاز کیا ہے۔
