واشنگٹن: سابق امریکی صدر ڈونلڈ ٹرمپ نے انکشاف کیا ہے کہ اپریل 2025 میں پاکستان نے بھارت کے پانچ جنگی طیارے مار گرائے تھے، جس کے بعد دونوں ممالک کے درمیان ایٹمی جنگ کا سنگین خطرہ پیدا ہو گیا تھا۔ ٹرمپ کے مطابق، اس نازک صورتحال میں انہوں نے ذاتی طور پر مداخلت کر کے خطے کو ایک تباہ کن جنگ سے بچایا۔
وائٹ ہاؤس میں ریپبلکن سینیٹرز کے اعزاز میں دیے گئے استقبالیے سے خطاب کرتے ہوئے ڈونلڈ ٹرمپ نے کہا کہ "یہ ایک نہایت حساس لمحہ تھا۔ پاکستان نے بھارت کے پانچ فائٹر جیٹ طیارے مار گرائے تھے، تاہم بھارت نے اس کا اعتراف نہیں کیا۔ اگر ہم نے بروقت سفارتی اقدامات نہ کیے ہوتے تو خطہ ایٹمی جنگ کی لپیٹ میں آ سکتا تھا۔”
انہوں نے بتایا کہ انہوں نے ذاتی طور پر پاکستان اور بھارت دونوں کی قیادت سے رابطہ کر کے حالات کو قابو میں لایا۔
یہ واقعہ اپریل 2025 میں اُس وقت پیش آیا جب مقبوضہ کشمیر کے علاقے پہلگام میں ایک دہشت گرد حملے میں 26 افراد ہلاک ہو گئے تھے۔ حملہ آوروں کی شناخت نہیں ہو سکی تھی، تاہم بھارت نے حسبِ معمول بغیر کسی ثبوت کے اس حملے کا الزام پاکستان پر عائد کر دیا۔ پاکستان نے ان الزامات کو سختی سے مسترد کرتے ہوئے غیر جانبدار بین الاقوامی تحقیقات کی پیشکش کی تھی۔ امریکہ نے حملے کی مذمت تو کی، مگر بھارت کے الزامات کی حمایت سے گریز کیا، جس سے واضح ہوا کہ عالمی برادری بھارتی دعووں پر شکوک و شبہات رکھتی ہے۔
ٹرمپ کا انکشاف: “پاکستان اور بھارت میں ایک ہفتے کے اندر ایٹمی جنگ چھڑ سکتی تھی”
7 مئی کو بھارت نے اچانک پاکستان کے خلاف جنگی کارروائی کا آغاز کیا، جس کے جواب میں پاکستان نے فوری اور مؤثر ردعمل دیتے ہوئے بھارت کے چھ جنگی طیارے، جن میں چار جدید رافیل فائٹر بھی شامل تھے، مار گرائے۔ پاکستان نے واضح کیا کہ اس کے تمام طیارے محفوظ رہے، جبکہ بھارت آج تک اپنے تباہ شدہ طیاروں سے متعلق کوئی قابلِ اعتبار ثبوت پیش نہیں کر سکا۔
اس کے بعد دونوں ممالک کے درمیان باقاعدہ مسلح تصادم شروع ہو گیا، جس میں جنگی طیاروں، ڈرونز اور آرٹلری کا استعمال ہوا۔ بھارت کو اس جنگ میں بھاری جانی و مالی نقصان اٹھانا پڑا، جس کے بعد وہ بالآخر امریکی ثالثی پر آمادہ ہوا۔
ٹرمپ نے اپنے خطاب میں دیگر عالمی امور پر بھی اظہار خیال کیا۔ غزہ کی صورتحال پر بات کرتے ہوئے انہوں نے کہا کہ جلد مزید یرغمالیوں کی رہائی ممکن ہے۔ کرپٹو کرنسی کے حوالے سے ان کا کہنا تھا کہ ان کی حکومت امریکہ کو کرپٹو ٹیکنالوجی کا عالمی مرکز بنانے کے لیے سرگرم ہے۔ ساتھ ہی انہوں نے دعویٰ کیا کہ ان کی انتظامیہ نے "بگ بیوٹی فل بل” منظور کروایا ہے جو امریکی معیشت اور سرمایہ کاری کے مستقبل میں کلیدی کردار ادا کرے گا۔
